فەرماندەی قەڵای ڕۆژهەڵات لە ڕۆژئاوای كەركووك رایدەگەیەنێت، هێزی پێشمەرگەی كوردستان سەركەوتنی گەورەی تۆمار كردووە، چاوەڕوان دەكرێت سەركەوتنی گەورەتریش تۆمار بكرێت، چونكە داعش ستراتیژییەتی شەڕی نەماوە.

جێگری سەرۆكی پارتیی ئازادیی كوردستان و فەرماندەی میحوەری قەڵای ڕۆژهەڵات لە ڕۆژئاوای كەركووك (حوسێن یەزدانپە‌نا) بە ماڵپەری فەرمیی پارتیی دیموكراتی كوردستانی راگەیاند، “داعش ناتوانێت مەترسی لەسەر شاری كەركووك دروست بكات، ئامانجی ئەوان ئەوەیە كە هێرش بكەنە سەر میحوەرێك و بگەڕێنەوە دواوە، واتە ئامانجی ستراتیژی و سەربازییان نییە و تەنیا دەیانەوێت خۆیان دەربخەن.”

(یەزدانپە‌نا) گوتیشی، “لە ماوەی یەك مانگی رابردوودا بە بەردەوامی بنكە و بارەگاكانیان لە گوبەیبە و سمایلاوا دەكوتین، لە ماوەی ئەو مانگەدا سەرجەم ئەو هێرشانەی كردوویانن تەنیا ماوەی چەند سەعاتێك بەردەوامییان پێ داون و دواتر شكاون و رایان كردووە، یەكێك لە ئامانجەكانیان ئەوەیە كە دەست بەسەر بۆرییە نەوتییەكانی كەركووكدا بگرن یان بێنە ناوشارەوە، بەڵام ئەمانە هەوڵی بێئەنجامن و لە هیچ میحوەرێك نەیانتوانیوە سەركەوتن بە دەست بهێنن”.

(حوسێن یەزدانپە‌نا) باسی لەوەیش كرد، “هیچ میحوەرێك نییە لە كەركووك داعش هێرشی كردبێت و تێیدا مابێتەوە، دوای هەر هێرشێكیان پێشمەرگە زۆر بە توندی وەڵامی داونەتەوە، لە ماوەی رابردوودا بەلایەنی كەم 400 داعش كوژراون و ژمارەیەكیان بە دیل گیراون، بۆیە لەباری دەروونییەوە داعش زۆر تێك شكاون، بە چاوی خۆیشم بینیم داعش چەكیان فڕێ دەدا و دەچوونە گوندەكان”.

ئەوەیشی خستە ڕوو كە پێشمەرگە مۆڵگەكانی خۆی بەهێز كردووە و ئەگەرەكانی هێرشی داعش لە بەرچاو گیراوە.

فەرماندەی قەڵای ڕۆژهەڵات لە ڕۆژئاوای كەركووك، گوتیشی: “شكانی هێزەكانی داعش لە میحوەری كەركووك دوو هۆكار بوو یەكەم: داعش لە شەڕدا ستراتیژییەتی وەك ستراتیژییەتی پێشمەرگە بەهێز نییە، چونكە ئەوان لە هێرشەكان ئامانجیان ئەوەیە بكوژرێن ئەم تاقیكردنەوەیەیان بۆ نەچووە سەر و، سەدان و هەزاران كوژراویان لە شەڕەكانی ئەم میحوەرە هەبووە، خاڵی دووەم: فڕۆكەی هاوپەیمانان رۆڵی كاریگەریان لە تێكشكاندنی داعشدا هەبووە”.

كارزان سەباح هەورامی

http://kdp.info/a/d.aspx?l=13&a=75367