دوای کەوتنی حەلەب ، روسیا و تورکیا ئاگر بەستیان لە حەلەب راگەیاند
دوای دوو ساڵی هێرش و شەری بەردەوام ، هێزەکانی ئەسەد و میلیشیا ئێرانیەکان بە هاوکاری بۆردومانی فرۆکەکانی روسیا توانیان حەلەب لە ژێر دەستی هێزەکانی ئۆپۆزسیۆنی نزیک لە تورکیا و سعودیە دەربهێنن .
کەوتنی حەلەب پێش ئەوەی شکستێک بێت بۆ هێزەکانی ئۆپۆزسیۆنی سوریا ، پلانێکی پێشوەخت ئامادەکراو بوو لە لایەن تورکیا و سعودیەوە بۆ هێزەکانی ئۆپۆزسیۆن بە چۆڵکردن و پاشەکشەپێکردنیان لەحەلەبەوە بۆ ئیدلیب ، پلانێک بو بۆ ئەوەی (لە جەنگێک بدۆڕێی بۆ ئەوەی لە شەرەکەدا سەرکەوتن بەدەست بهێنی) .
ماوەی دوو ساڵ بوو هێزەکانی ئۆپۆزسیۆن لە حەلەب لەلایەن هێزەکانی ئەسەد و میلیشیائێرانیەکانەوە تەواو گەمارۆ درابوون ، پێداویستیەکانی شەرکردنیان بەرەو نەمان دەرۆیشت هەر بۆیە لەگەڵ روسیا رێککەوتن تا لە حەلەب پاشەکشەبکەن بەرەو ئیدلب کە ئەوەش بۆ مەبەستی پاراستنی گیانی چەکدارەکانیان بوو .
دوای کەوتنی حەلەب ، روسیا و تورکیا ئاگر بەستیان لە حەلەب راگەیاند ، دواتر پرۆژە بریارێکی هاوبەشیان پێشکەش بە ئەنجومەنی ئاسایش پێشکەش کرد ، لەو پرۆژە بریارەدا ئێران پشتگوێ خرا ، تیایدا داوای کێشانەوەی میلیشیاکان دەکات لە حەلەب .
لێرەدا دەستکەوتەکانی هەرلایەک بە جیا ئاماژە بێدەدەین :
تورکیا:
دەیان گروپی ئۆپۆزسیۆن کە لە ماوەی رابردودا تورکیا پشتگیری دەکردن ، لەلایەن روسیاوە بە تیرۆریست ناسرا بوون ، دوای کەوتنی حەلەب بە رەزامەندی روسیا تەواوی ئەو گروپانە کشێنرانەوە بۆ ئیدلیب ، دوای ئاگربەستەکە روسیا چیتر بە تیرۆریست ناویان نابات و شەرعیەتی ئۆپۆزسیۆنی پێ بەخشین کە ئەو گروپانە نزیکەی ٦٠ هەزار چەکداریان هەیە .
تورکیا بەهۆی رازیبوونی بە بەدەستەوادانی حەلەبەوە توانی درز بخاتە نێوان ئێران و روسیا ، ئێران نیگەرانە و پابەند نابێ بە ئاگربەستەکە ئەمەش مانای دورکەوتنەوەی روسیا دەگەیەنێ لە پشتگیری سەربازی لە شەرەکانی ئایندەدا.
روسیا:
رێککەوتنی تورکیا و روسیا بەمانای ئەوەدێت کە روسیا لە تەواوی ئەو تاوانانەی لە سوریا کە لە دوو ساڵی رابردودا ئەنجامی داون ، پاک بێتەوە و هیچ بەرپرسیاریەتێکی ئەنجامدانی ئەو تاوانانەی لە ئایندەدا لە ئەستۆ نەمێنێت .
روسیا بە رازیبونی تورکیا دەتوانێ تەواوی ئەو دەستکەوتانە جێگیربکات کە لەسوریا بەدەستی هێناون ، لە گفتوگۆکانی ئایندەی سوریاش بەهێزتر لە جاران رۆڵ دەگێڕێت.
ئێران :
ئێران توانی لە جەنگی حەلەب سەرکەوتن بەدەست بهێنێت و شارەکە داگیربکات دوای ئەوەی چەند ساڵێک بوو بەدەستی ئۆۆزسیۆنەوە بوو ، گرنگی حەلەب لەوەدایە کە ئەوەی دەستی بەسەردا بگرێت دەتوانێ ئاراستەی روداوەکانی ئایندەی سوریا لە بەرژەوەندی خۆی ئاراستە بکات .
ئیدلیب لە دوای حەلەب .
تەواوی چەکدارەکانی ئۆۆزسیۆنی سوریا ئەوانەی تورکیا و سعودیە پشتگیریان دەکەن ئێستا لە ئیدلیب کۆبونەتەوە ، روسیا چیتر بە تیرۆریست نایانناسێت ، واتا لە شەرەکانی ئایندەدا روسیا لە دژیان ناجەنگێت بەوەش ئایندەی شەر لە بەرژەوەندی ئەواندا دەبێت و هێزەکانی ئەسەد و میلیشیا ئێرانیەکان بە تەنها لە شەرەکاندا دەمێننەوە .
دەکرێ بگوترێت کە لەمەودوا لە سوریا ، سعودیە و تورکیا و روسیا لە یەک بەرەدا دەبن .
دوو هەفتەی تر سەرۆکی نوێی ئەمریکا دەست بەکار دەبێت ، پێشبینی کراوە ئەو ستراتیژەی کە ئۆباما لەسەری دەرۆیشت گۆرانکاری بەسەردا بێت .
لە پرۆژە بریارە نوێکەی ئەنجومەنی ئاسایشدا تەنها (داعش و جبهة فتح الشام) وەک گروپی تیرۆریستی ناسراون ، واتا هاوپەیمانان تەنها ئەوان دەکەن بە ئامانج ، بەشداری ئەو شەرانە نابن کە لە نێوان هێزەکانی ئۆپۆزسیۆن و میلیشیا ئێرانیەکان و هێزەکانی ئەسەد رودەدەن .
کەواتە هێزەکانی ئەسەد و میلیشیا ئێرانیەکان لەلایەک دەبێ شەری (داعش و جبهة فتح الشام )بکەن ، لەلاکەی تر شەری دەبێ شەڕی ئۆپۆزسیۆن بکەن .