حوسێن یەزدانپەنا: ناوچەیەكی فراوانمان ئازاد كردووە و خەریكی سەنگەربەندیین.. سی تەرمی داعش جێماون

pazadik:

سەخرە -KDP.info- فەرماندەی هێزی پێشمەرگەی ڕۆژهەڵات لە ڕۆژئاوای كەركووك دەڵێ، سەعات 5:30ـی ئەم بەیانییە هێزەكانی پارتی ئازادی كوردستان هاوشانی پێشمەرگەكانی لیوای (2) و لیوای (10)ـی وەزارەتی پێشمەرگە و پۆلیسی قەزاوناحیەکانی کەرکووک هێرشمان برد بۆ ئەو ناوچانەی بۆمان دیاری كرابوو، توانیمان ئەو مەترسیە لەسەر شاری كەركووك هەڵگرین. گوتیشی: "زیاتر لە (30) تەرمی تیرۆرستانی داعش كەوتووەتە ژێر دەستمان لەگەڵ چەكوچۆڵێكی یەكجار زۆر."

(حوسێن یەزدانپەنا) جێگری سەرۆكی پارتیی ئازادیی كوردستان و فەرماندەی هێزی پێشمەرگەی ڕۆژهەڵات لە ڕۆژئاوای كەركووك بە ماڵپەڕی‌ فەرمیی پارتیی‌ دیموكراتی كوردستانی ڕاگەیاند: "پاش ئەوەی فڕۆكە جەنگییەكانی هاوپەیمانان بۆردومانی خۆیانیان کرد، سەعات5:30ـی خولەکی ئەم بەیانییە، ئێمە وەكو هێزەكانی پارتی ئازادی كوردستان (پاك) هاوشانی پێشمەرگە قارەمانەكانی لیوای (2) و لیوای (10)ـی سەر بەوەزارەتی پێشمەرگە دەست مان بە هێرش بردن كرد بۆ ئەو ناوچانەی كە بە گوێرەی پلان بۆمان دیاری كرابوو. توانیشمان ئەو مەترسیە لەسەر شارەخۆشەویستەکەی كەركووكی هەڵگرین و ئارامی بۆ ناوچەكە بگەڕێنینەوە و تیرۆرستان بە ڕۆژی خۆیان بگەیێنین."

(حوسێن یەزدانپەنا) دەربارەی چالاكیەكانیان لە هێرشەكەی ئەمڕۆدا گوتی: "سەرەتا هەڵساین زنجیرەچیاكانی (سمایلاوە)مان ئازاد کرد كە زیاتر لە 15 كیلۆمەترە و هەرسێ گوندەکەی (سمایلاوە)یشمان ڕزگار كرد و تیرۆرستان نەیانتوانی بەگری بكەن و، سەرتاپایان كوژران و، ڕزگاریان نەبوو، دواتر هێرشمان كردە سەر شارۆچكەی (سەخرە) و ئازادمان كرد و ئێستا ئەو ناوچانە هێزی پێشمەرگەیان لێیە و، لەوێ خەریكی سەنگەربەندین."

فەرماندەی هێزی پێشمەرگەی ڕۆژهەڵات لە میحوەری كەركووك ڕایشیگەیاند: "ئێمە وەكو هێزەكانی پارتی ئازادی كوردستان لە میانی هێرشەكانی ئەمڕۆماندا زیاتر لە (30) تەرمی تیرۆریستانی داعش كەوتووەتە ژێر دەستمان، هەروەها دەستمان بەسەر چەكوچۆڵێکی یەكجار زۆردا گرتووە، بڕە (تی‌ئێن‌تی)ـیەکی زۆریشمان لێ گرت، بێجگە لەو چەند (حەفارە و شۆفەڵ)ـەیش وا بەجێیان هێشتووە."