خوشک و برایانی تێکۆشه‌ر!

پێشمه‌رگه‌ و جه‌ماوه‌ری پارتی ئازادیی کوردستان!

رۆڵه‌ خه‌باتگێڕه‌کانی نه‌ته‌وه‌ی کورد!

   ئه‌مڕۆ 18 ساڵ‌ له‌ گیانبه‌ختکردنی رۆڵه‌ی هه‌ڵکه‌وتووی نه‌ته‌وه‌ی کورد، دامه‌زرێنه‌ر و رێبه‌ری پارتی ئازادیی کوردستان راده‌برێ. 18 ساڵ له‌مه‌وبه‌ر له‌ کاتێکدا له‌ ئاکامی گۆڕانکارییه‌ سیاسییه‌کانی عێراق و باشووری کوردستان، رێژیمی داگیری کۆماری ئیسلامی به‌ که‌ڵک وه‌رگرتن له‌و هه‌لومه‌رجه‌ توانیبووی ده‌ستی تێرۆری و تێکدانی بگاته‌ باشووری کوردستان، یه‌که‌م په‌لاماری تێرۆریستی بۆ سه‌ر خه‌باتگێڕانی کوردی رۆژهه‌ڵات، له‌ شه‌هید سه‌عیدیه‌زدانپه‌ناوه‌ ده‌ست پێکرد. شه‌هید سه‌عیدیه‌زدانپه‌نا کاتێک شه‌هید بوو که‌ ته‌نیا 27 ساڵ به‌رله‌و رێکه‌وته‌ چاوی به‌دنیا هه‌ڵهێنابوو و له‌ سه‌رده‌می راپه‌ڕینی گه‌لانی ئێران دژ به‌ دیکتاتۆریی سه‌ڵته‌نه‌تی تێکه‌ڵ به‌ خه‌باتی سیاسی بوو بوو. هه‌رچه‌نده‌ زۆر لاو بوو، به‌ڵام هه‌ر له‌وکاته‌دا که‌ تێکه‌ڵ به‌ خه‌بات بوو، به‌هره‌ و توانا و لێوه‌شاوه‌یی بۆ هاوڕێ و ناسراوانی سه‌لماند.

  ئه‌مڕۆ که‌ له‌م بۆنه‌یه‌دا به‌یه‌ک ده‌گه‌ینه‌وه‌، له‌سه‌ر هه‌موومانه‌ ساتێک بیر له‌وه‌ بکه‌ینه‌وه‌ که‌ بۆچی ئه‌و تێکۆشه‌ره‌ی گه‌لی کورد بوو به‌ یه‌که‌م نیشانه‌ی تیری تێرۆری دوژمنی داگیرکه‌ر؟ وڵامی ئه‌م پرسیاره‌ و رازی ئه‌م رووداوه‌ له‌ بیر و باوه‌ڕه‌ به‌رزه‌که‌ی ئه‌و شه‌هیده‌دایه‌. سه‌عید یه‌زدانپه‌نا رێگایه‌کی کرده‌وه‌ و رچه‌ی رێگایه‌کی شکاند که‌ به‌ر له‌و ته‌نیا پیاوه‌ گه‌وره‌کانی کورد پێیدا رۆیشتبوون، که‌سانی وه‌کوو شێخ عوبه‌یدوڵڵای نه‌هری و سمکۆی شکاک و پێشه‌وا قازی محه‌ممه‌د.

  ئه‌و رێگایه‌، رێگه‌ی رزگاری یه‌کجاریی کورد له‌بنده‌ستی هه‌ر داگیرکه‌رێک بوو، ئه‌و رێگایه‌، رێگه‌ی خۆناسین  و گه‌ڕانه‌وه‌ بۆ ره‌سه‌نایه‌تی نه‌ته‌وه‌یی بوو. ئه‌و رێگایه‌ی سه‌عیدیه‌زدانپه‌نا پێیدا رۆیشت، نیشانه‌ی له‌ دڵی شۆڤێنیزمی ئێرانی گرتبوو و فکر و بیر و باوه‌ڕی ئه‌و / که‌ دڵنیان رۆژێ سه‌رده‌که‌وێ/ به‌ردی بناغه‌ی ئێرانیگه‌ری و ئێرانچیه‌تی ده‌ردێنێ و ته‌نیا باوه‌ڕی به‌ سه‌روه‌ری نه‌ته‌وه‌ی کورد له‌ سه‌ر خاکی خۆی هه‌یه‌ و ته‌نیا شه‌کانه‌وه‌ی ئاڵایه‌ک له‌ سه‌ر خاکی وڵاتی خۆی قبووڵ ده‌کا، که‌ ئه‌وه‌یش ئاڵای پیرۆزی کوردستانه‌.  به‌ڵێ! رازی ئه‌وه‌ی که‌ یه‌که‌م تیری تێرۆریستان به‌ره‌و مێشکی ئه‌و پیاوه‌ گه‌وره‌ رۆیی، ئه‌و بیر و باوه‌ڕه‌ بوو.

   سه‌عید یه‌زدانپه‌نا ئه‌گه‌ر چی له‌ کاتی گیانبه‌ختکردنیدا زۆر لاو بوو، به‌ڵام کۆمه‌ڵێک فکر و رێباز و سیاسه‌تی داهێنا له‌ رۆژهه‌ڵاتی کوردستان که‌ تا پێش ئه‌و له‌و پا‌رچه‌یه‌ی نیشتمان بوونیان نه‌بوو. تاکاتێک ئه‌و ئاڵای ئه‌و ئامانجانه‌ی به‌ ده‌سته‌وه‌ نه‌گرتبوو، کورد له ‌رۆژهه‌ڵاتی کوردستان خۆی به‌ ئێرانی ده‌زانی و رێبه‌رانی کورد نه‌یانده‌شارده‌وه‌ و رایانده‌گه‌یاند که‌ ئێمه‌ ئێرانیین و له‌ هه‌موو ئێرانییه‌ک خۆیان به‌ ئێرانیتر ده‌زانی. به‌ڵام ئه‌و راست به‌ پێچه‌وانه‌وه‌ رایگه‌یاند که‌: " ئێمه‌ کوردین، خه‌ڵکی وڵاتی داگیرکراوی کوردستانین، به‌ بێ ترس و له‌رز له‌وه‌ی پێمان بڵێن ته‌جزیه‌ته‌ڵه‌ب و جیاوازیی خواز".

  ئه‌وه‌ سه‌عیدی یه‌زدانپه‌نا بوو به‌ شاهیدی مێژوو، به‌شاهیدی نووسراوه‌کان، به‌ شاهیدی په‌یڤه‌ نه‌مره‌کانی که‌ بۆ یه‌که‌مجار له‌و پارچه‌یه‌ی کوردستان داوای یه‌کڕیزی هه‌موو رۆڵه‌کانی نه‌ته‌وه‌ی کوردی کرد و داوای کرد که‌ هێزه‌ سیاسییه‌کانی ئه‌و پارچه‌یه‌ی کوردستان به‌ره‌یه‌کی یه‌کگرتووه‌ی کوردستانی دابمه‌زرێنن. ئه‌وه‌ ئه‌و بوو‌ بۆ یه‌که‌مجار له‌کاتێکدا دروشمی هه‌موو حیزبه‌ سیاسییه‌کانی ئه‌و پارچه‌یه‌ی کوردستان خودموختاری بوو، خودموختاری ره‌تکرده‌وه‌ و سه‌ربه‌خۆیی به‌ ئامانجی درێژخایه‌نی خه‌باتی کورد دانا. له‌ کاتێکدا هه‌موو هێزه‌ سیاسییه‌ کوردستانییه‌کان به‌چپ و به‌ راستیانه‌وه‌ تاقه‌ دروشمیان خودموختاری بوو ئه‌و فیدرالیزمی بۆ قۆناخێک له‌ خه‌باتی نه‌ته‌وه‌ی کورد داهێنا. له‌ کاتیکدا که‌ بزووتنه‌وه‌ی کورد له‌ ژێر کاریگه‌ری بیری مارکسیستیدا بوو و له‌ ژێر کاریگه‌ری ئه‌و رێبازه‌دا دروشمی هێزه‌ سیاسییه‌کان دژایه‌تی له‌گه‌ڵ رۆژئاوا و نه‌مان بۆ ئه‌‌مریکا بوو، ئه‌و له‌سه‌ر ئه‌وه‌ پێی داگرت که‌ کورد پێویستی به‌ هاوپه‌یمانی نێوده‌وڵه‌تی هه‌یه‌، پێویستی به‌وه‌ هه‌یه‌ که‌ هه‌موو ده‌وڵه‌تان و گه‌لانی جیهان بکاته‌ دۆستی خۆی بۆ ئه‌وه‌ی له‌ بنده‌ستی رزگاری بێ. له‌کاتێکدا که‌ گرووپ و لایه‌نی دیکه‌ به‌ دوای ئیده‌ی کۆمۆنیزمی کرێکاری که‌وتبوون، یان به‌دوای دروشمی به‌ره‌‌ی دژی ئیمپریالیستی که‌وتبوون ئه‌و له‌سه‌ر دیپلۆماسی نه‌ته‌وه‌یی پێیداگرت، به‌و مانایه‌ی که‌ کورد بێجگه‌ له‌وه‌ی پێویسته‌ خه‌باتی توند وتۆڵ به‌ڕێوه‌به‌رێ، به‌ڵام پێویستی به‌وه‌یه‌ که‌ دیپلۆماسییه‌کی چالاکیش به‌ڕێوه‌به‌رێ و دۆستانی خۆی له‌ ئاستی نێوده‌وڵه‌تیدا زیاد بکا.

   به‌ڵێ! مێژوو شاهیدی ده‌دا که‌ تاپێش ئه‌و سه‌رکرده‌ لاوه‌ی کورد هیچ که‌سێکی تر خاوه‌نی ئه‌م چه‌مکانه‌ نه‌بووه‌. دروست 10 ساڵ‌ له‌ پاش ئه‌م رچه‌ شکێنییه‌ و 10 ساڵ‌ له‌پاش گیان به‌ختکردنی ئه‌و بوو که‌ تازه‌ به‌ره‌به‌ره‌ لێره‌ و له‌وێ حیزبه‌کانی دیکه‌ روویان له‌و رێبازه‌ کرد، روویان له‌و دروشم و سیاسه‌تانه‌ کرد که‌ ئه‌و دایهێنابوون. به‌ڵام تا ئێستاش هیچ هێز و لایه‌نێکی دیکه‌ لایه‌نی سه‌ر گۆڕه‌پانه‌که‌ نه‌یتوانیه‌وه‌ بگاته‌ فکر و ئیده‌ به‌رزه‌کانی سه‌عیدیه‌زدانپه‌نا که‌ رزگاری یه‌کجاریی و به‌ده‌وڵه‌ت بوونی کورد و رادانی دوا سه‌ربازی داگیرکه‌ر له‌ بست به‌ بستی خاکی نیشتمان و هه‌ڵکردنی ئاڵای کوردستان له‌ هه‌موو کوردستانه‌.

هه‌ڤاڵانی خۆشه‌ویست!

خۆشک و برایانی تێکۆشه‌ر!

  کۆماری ئیسلامی به‌ تێرۆری ئه‌و سه‌رکرده‌ لاوه‌ی کورد دوو ئامانجی سه‌ره‌کی مه‌به‌ست بوو ئامانجی یه‌که‌می ئه‌وه‌ بوو که‌ به‌ تێرۆری ئه‌و، رێبه‌رێکی زانا و لێهاتوو و خاوه‌ن عه‌قڵ به‌ جه‌سته‌ له‌ناو به‌ڕێ. مه‌به‌ستی دووهه‌می ئه‌وه‌ بوو ئه‌و حیزبه‌ی سه‌عید یه‌زدانپه‌نا دایمه‌زراندبوو، له‌ نیوه‌ی رێدا تێک بشکێ و نه‌توانێ ئامانجه‌کانی ئه‌و وه‌دی بێنێ. مخابن که‌ ئامانجی یه‌که‌می به‌ده‌ست هێناو ئه‌و تێکۆشه‌ره‌ لێهاتووه‌ی نه‌ته‌وه‌ی کوردی به‌ جه‌سته‌ له‌ناو برد. به‌ڵام زۆر نه‌زان بوون ئه‌وانه‌ی که‌ پیلانی تێرۆری سه‌عیدیان کێشا که‌ پێیان وابوو به‌ نه‌هێشتنی جه‌سته‌یی ئه‌و، ئیتر رێگا و رێبازه‌که‌ی کوێر ده‌بێته‌وه‌. راسته‌ ئه‌و له‌ نێو ئێمه‌دا رۆیشت و نه‌یتوانی خزمه‌تی زیاتر به‌ کورد و به‌ کوردستان بکا، به‌ڵام ئه‌و ئه‌رکی خۆی به‌جێهێنا و به‌ به‌جێ هێشتنی فکر و رێباز و ئه‌و رێگا پیرۆزه‌ی که‌ دایهێنا، میراتێکی وه‌های بۆ قوتابیان و هاوڕێ و هاوسه‌نگه‌رانی به‌جێهشت که‌ خه‌یاڵی دوژمنی داگیرکه‌ری کرده‌ بڵقی سه‌ر ئاو و سه‌عید ئه‌گه‌ر به‌ جه‌سته‌ له‌نێو ئێمه‌دا نه‌ما، رێبازه‌که‌ی زیندووه‌ و رۆژ به‌ رۆژ رۆڵه‌کانی نه‌ته‌وه‌ی کورد پتر و زیاتر له‌ ده‌وری ئه‌و رێبازه‌ کۆ ده‌بنه‌وه‌. له‌ مه‌به‌ستی دووهه‌میشدا؛ واته‌ تێکشکاندنی حیزبه‌که‌ی سه‌عید هه‌تا سه‌ر ئێسقان خه‌یاڵی خاو بوو. سه‌رانی کۆماری ئیسلامی پێیانوابوو که‌ به‌ تیرۆی ئه‌و، خۆی و حیزبه‌که‌ی له‌ رۆژێکدا ده‌نێژن. به‌ڵام چ نه‌زان بوون ئه‌وانه‌ی که‌ پێیانوابوو که‌ ئیتر به‌ تێرۆری ئه‌و حیزبه‌که‌شی له‌ ناو ده‌چێ. چ نه‌زان بوون سه‌رانی کۆماری ئیسلامی که‌ پێیانوابوو ئه‌و رێگایه‌ به‌ نه‌مانی سه‌رقافڵه‌که‌ی کوێر ده‌بێته‌وه‌. هێشتا 40 رۆژ له‌ گیان به‌ختکردنی تێنه‌په‌ڕی بوو که‌ هێزی پێشمه‌رگه‌ی پارتی ئازادیی کوردستان، به‌ ئه‌نجامدانی چالاکییه‌کی گه‌وره‌ و به‌سزا گه‌یاندنی فه‌رمانده‌ی یه‌کێک له‌ له‌شکره‌ هه‌ره‌ لێهاتووه‌کانی کۆماری ئیسلامی، واته‌ له‌شکری قودس، به‌هه‌موو لایه‌کی راگه‌یاند که‌ هه‌ر چه‌ند پارتی ئازادیی کوردستان سه‌رکرده‌که‌ی شه‌هید بووه‌ و هه‌رچه‌ند برینێکی قووڵی هه‌ڵگرتووه‌، به‌ڵام جوامێرانه‌ له‌ مه‌یداندا راوه‌ستاوه‌ و  ئه‌و رێگایه‌ی سه‌عید گیانی بۆ به‌ختکرد هه‌رگیزاو هه‌رگیز کوێر نابێته‌وه‌.

خۆشک و برایانی به‌ڕێز!

  که‌ من باس له‌و پیاوه‌ گه‌وره‌ ده‌که‌م هه‌رگیز به‌ مانای ئه‌وه‌ نییه‌ که‌ باس له‌ بابه‌تێکی شه‌خسی ده‌که‌م یان باس له‌ یه‌کێک له‌ که‌سانی بنه‌ماڵه‌که‌م ده‌که‌م. بۆ من و بۆ پارتی ئازادیی کوردستان، له‌ نێوان شه‌هیده‌کانماندا هیچ جیاوازییه‌ک نییه‌. هه‌موو شه‌هیدانی پارتی ئازادیی کوردستان برا و خۆشه‌ویست و هاوڕێ و هاوسه‌نگه‌ری من بوون و بۆ هیچیان که‌متر له‌ سه‌عیدی برام ئازاری فیراق و شه‌هید بوونیانم نه‌چێشتووه‌. به‌ڵام ئه‌وه‌ی که‌ واده‌کا من باس له‌و پیاوه‌ تێکۆشه‌ره‌ بکه‌م، ده‌وری ئه‌و بوو له‌ حیزبی ئێمه‌دا و له‌ بزووتنه‌وه‌ی رزگاریخوازیی نه‌ته‌وه‌ی کورددا.

  جێگای شه‌هید سه‌عید له‌ نێو نه‌ته‌وه‌ی کورد و له‌ ریزه‌کانی بزووتنه‌وه‌ی رزگاریخوازی کوردستاندا جێگایه‌کی تایبه‌تیه‌. پێمخۆشه‌ سه‌رنجی هه‌موو ئێوه‌ خۆشک و برایانی به‌ڕێز بۆ ئه‌وه‌ رابکێشم که‌ سه‌رکرده‌ی ئێمه‌ کۆمه‌ڵێک تایبه‌تمه‌ندی تایبه‌ت به‌ خۆی هه‌بوو، له‌وانه‌: ئه‌و که‌م ته‌مه‌نترین سه‌رکرده‌ی کورده‌. کاتێک که‌ گیانی به‌ختکرد تازه‌ 27 ساڵی عومر بوو. 27 ساڵ بۆ ئینسانێک که‌ بگاته‌ ئاستی سه‌رکرده‌یی و ئاستی داهێنانی فکر و سیاسه‌ت، ته‌مه‌نێکی یه‌کجار که‌مه‌. دووهه‌م هه‌تا ئێستاشی له‌گه‌ڵدا بێ له‌ 18 ساڵی رابردوو به‌ملاوه‌، فکر و رێبازێک که‌ شه‌هید سه‌عید دایهێنا هێژموونی هه‌یه‌  له‌ نێو بزووتنه‌وه‌ی رۆژهه‌ڵاتی کوردستاندا. راسته‌ که‌س ناڵێ  ئه‌وه‌ فکر و ئیده‌ی سه‌عیدی یه‌زدانپه‌نا بوو، راسته‌ زۆر جار دان نانرێ به‌ خاوه‌نانی داهێنانێکدا و باس له‌وه‌ ناکری که‌ کێ سه‌رقافڵه‌ی چ رێگایه‌ک بوو، به‌ڵام هێژموونی و زاڵیی فکری و سیاسی 18 ساڵی رابردووی بزووتنه‌وه‌ی کورد له‌ رۆژهه‌ڵاتی کوردستان، فکر و سیاسه‌ت و رێبازی شه‌هید سه‌عیدی یه‌زدانپه‌نایه‌ که‌ هه‌مان رێبازی پارتی ئازادیی کوردستانه‌.

   هیچ که‌سێک له‌هیچ لایه‌که‌وه‌، هیچ شتێکی سیاسی دانه‌هێناوه‌ به‌ده‌ر له‌و‌ چوارچێوه‌یه‌ی که‌ ئه‌و دایهێنا. یه‌که‌م که‌س بوو باسی له‌ فیدرالیزم کرد. یه‌که‌م که‌س بوو باسی له‌ زه‌رووره‌تی پێکهێنانی به‌ره‌ی کوردستانی کرد. یه‌که‌م که‌س بوو پێی له‌سه‌ر کوردستانی بوون له‌ به‌رانبه‌ر ئێرانیی بوون داگرت. یه‌که‌م که‌س بوو باسی له‌ دیپلۆماسی نه‌ته‌وه‌یی کورد و زه‌رووره‌تی پێوه‌ندیی له‌گه‌ڵ هه‌موو ده‌وڵه‌تانی دنیا کرد.

 که‌واته‌ ئه‌وه‌ی ئێستا ده‌گوترێ و ده‌نووسرێ و ده‌بیسرێ، هیچی به‌ده‌ر له‌و رێباز و رێگاو سیاسه‌ته‌ نییه‌ که‌ ئه‌و دایهێنا و پارتی ئازادیی کوردستان و تێکۆشه‌ره‌کانی ئاڵا‌یان هه‌ڵگرتووه‌.

  خاڵێکی دیکه‌ که‌ زۆر زۆر گرینگه‌، ئه‌وه‌یه‌ که‌ سه‌عیدیه‌زدانپه‌نا میراتی هیچ که‌سی پێنه‌بڕا بوو. له ‌هیچ حیزبێکی دیکه‌ جیا نه‌ببووه‌ و ناوی هه‌مان حیزب له‌سه‌ر خۆی بنێ و هه‌مان رێگا و رێباز درێژه‌ پێبدا. شتێکی نوێی داهێنا، رێگایه‌کی تازه‌ی کرده‌وه‌ و بناغه‌یه‌کی تازه‌ی دانا. ئه‌وه‌ زۆر جیاوازه‌ له‌گه‌ڵ که‌سانێک که‌ به‌ میراتی که‌سانی دیکه‌وه‌ رێگایه‌ک ده‌پێون. ئه‌وه‌ خاڵێکه‌ که‌ ئێوی تێکۆشه‌ر، ئێوه‌ی لاوانی کورد و تێکۆشه‌رانی کورد ده‌بێ زۆر به‌ باشی سه‌رنجی بده‌نێ و به‌ باشی تێیبگه‌ن که‌ ئه‌و نه‌مره‌ چ ده‌ورێکی گه‌وره‌ی له‌خه‌بات و له‌ داهێنانی سیاسیدا هه‌بووه‌‌.

خۆشک و برایانی ئازیز!

   ئه‌مڕۆ ته‌نیا رۆژی یادکردنه‌وه‌ی شه‌هید سه‌عید نییه. ئه‌و‌ سه‌رقافڵه‌ی شه‌هیدانی پارتی ئازادیی کوردستانه‌، به‌ڵام به‌دوای ئه‌ودا یه‌ک یه‌ک، یان پۆل پۆل له‌ رێبوارانی رێگاکه‌ی و له‌ قوتابیه‌ به‌ ئه‌مه‌گه‌کانی، یان له‌ مه‌یدانه‌کانی به‌ربه‌ره‌کانێ و به‌گژداچوونی داگیرکه‌ران، یان له‌ ئه‌شکه‌نجه‌گاکانی دوژمندا، یان له‌ پیلانه‌ تێرۆریستیه‌کاندا گیانیان به‌ختکرد. ئه‌مڕۆ به‌ گه‌وره‌یی پله‌ی شه‌هیده‌کانمان، به‌ڕێز و به‌رزیی ناو و یادی شه‌هیده‌کانمان، به‌ رۆژی هه‌موو شه‌هیدانی پارتی ئازادیی کوردستان دیاری کراوه‌ و ئێمه‌ له‌م رۆژه‌دا که‌ رۆژی شه‌هید بوونی شه‌هید سه‌عیده‌ سه‌ری رێز بۆ هه‌موو شه‌هیده‌کانی پارتی ئازادیی کوردستان دادنه‌وێنین. ئه‌مڕۆ په‌یمان له‌گه‌ڵ هه‌موو ئه‌و شه‌هیدانه‌ نوێ ده‌که‌ینه‌وه‌ که‌ درێژه‌ده‌ری رێگایان بین و هه‌تا وه‌دیهێنانی ئامانجه‌کانیان نه‌سره‌وین.

   ئه‌مڕۆ ئێمه‌ خه‌باتگێڕانی ریزه‌کانی پارتی ئازادیی کوردستان وێڕای بنه‌ماڵه‌ سه‌ربه‌زره‌کانی شه‌هیده‌کانمان ده‌ڵێین: سوپاس بۆ خوای گه‌وره که‌ خوێنی شه‌هیده‌کانمان به‌ فیڕۆ نه‌چوو. سوپاس بۆ خوای گه‌وره‌ که‌ شه‌هیده‌کانمان و بنه‌ماڵه‌کانیان بێناو و بێقه‌در و بێناز و بێخاوه‌ن نین و رێبواران و هاوسه‌نگه‌رانی رۆڵه‌کانی ئه‌وان تێکۆشه‌رانێکی وه‌فادار و به‌ئه‌مه‌گن که‌ هه‌رگیز ناهێڵن ناو و یادی هاوڕێ‌ شه‌هیده‌کانیان نه‌مێنی و له‌بیر بکرێ و له‌یاد بچێته‌وه‌. ئێمه‌ هه‌رده‌م له‌گه‌ڵ ئه‌وان ده‌ژین و یادی ئه‌وان هه‌میشه‌ هانده‌رمانه‌ بۆ درێژه‌دانی خه‌بات له‌ پێناو وه‌دیهێنانی ئامانجه‌کانی ئه‌واندا.

   رێبازی شه‌هید سه‌عید رێبازێکی پیرۆزه‌. رێگای ئه‌و رێگای وه‌ده‌ستهێنانی ئیمتیازاتی تایبه‌تی بۆ هیچ شه‌خس و که‌سێک نییه‌. ئێمه‌ که‌ رێگه‌ی ئه‌و درێژه‌ ده‌ده‌ین نه‌ک له‌ پێناو گه‌یشتن به‌ کورسی ده‌سه‌ڵات و پله‌ و پایه‌ و سامانی دنیایی بێ. رێبازی شه‌هید سه‌عید و رێبازی شه‌هیده‌کانی پارتی ئازادیی کوردستان و رێگه‌ی تێکۆشه‌رانی پارتی ئازادیی کوردستان رێگای وه‌دیهێنانی ئازادییه‌. رێگای وه‌دیهێنانی ئازادی خاک و گه‌لی کورد له‌ بنده‌ستی هه‌ر داگیرکه‌رێکه‌. رێگای دادپه‌روه‌ری و عه‌داڵه‌ته‌. رێگای به‌خته‌وه‌ریی چین و توێژه‌ هه‌ژاره‌کانی کوردستانه. رێگای گه‌یشتن به‌ یه‌کسانییه‌. رێگای کۆتایی هێنان به‌ ته‌نگ ده‌ستی و هه‌ژاری و بێ ده‌ره‌تانییه‌. بۆیه‌ ئه‌م حیزبه،‌ حیزبی هه‌ژاران و حیزبی ئازادییخوازان و حیزبی دادپه‌روه‌رانه‌. حیزبی ئه‌وانه‌یه‌ که‌ گیان و سامان و ته‌مه‌نی خۆیان له‌ پێناو به‌خته‌وه‌ریی ئینسانه‌کانی دیکه‌دا ته‌رخان ده‌که‌ن. هه‌تاکوو ئه‌م رێبازه‌ هه‌بێ، هه‌تاکوو ئه‌م رێبازه‌ پڕ رێبوار بێ، له‌نگه‌ری کوردایه‌تی راسته‌قینه‌ له‌ وڵاتی ئێمه‌دا به‌هێز ده‌بێ. هه‌تا کوو ئه‌م رێگایه‌ سه‌رکه‌وتوو و پڕ رێبوار بێ، هه‌ژاران و زه‌حمه‌تکێشانی وڵاته‌که‌مان خاوه‌نی پشت و په‌نا ده‌بن. بۆیه‌ ئه‌رکی هه‌موومانه‌ که‌ رێگای شه‌هید سه‌عیدی یه‌زدانپه‌نا درێژه‌ بده‌ین و له‌ ئامانج و فکر و ئیده‌کانی بگه‌ین. لا‌وانی خوێنده‌واری کوردستان له‌سه‌ریانه‌ لێکۆڵینه‌وه‌ و توێژینه‌وه‌ له‌ فکر و رێبازی  ئه‌و سه‌رکرده‌ نه‌مره‌ بکه‌ن و پێشکه‌شی نه‌وه‌کانی داهاتووی بکه‌ن.

 خۆشک و برایانی به‌ڕێز!

   له‌ روانگه‌ی ئێمه‌وه‌، هه‌موو شه‌هیدانی بزووتنه‌وه‌ی رزگاریخوازی کوردستان شه‌هیدی نه‌ته‌وه‌ی کوردن. هه‌روه‌ک له‌ کاتی خه‌باتدا له‌ روانگه‌ی ئێمه‌وه‌ له‌ نێوان تێکۆشه‌رانی کورددا، له‌ نێوان پێشمه‌رگه‌ی کورددا فه‌رق و جیاوازیی نییه و ده‌بێ هه‌موو رۆڵه‌کانی خه‌ڵکی کوردستان، هه‌موو پێشمه‌رگه‌کانی کوردستان له‌یه‌ک سه‌نگه‌ردا بۆ ئازادیی خه‌بات بکه‌ن، هه‌رواش شه‌هیده‌کانمان شه‌هیدی هه‌موو نه‌ته‌وه‌ی کوردن. بۆیه‌ له‌مڕۆژه‌دا واته‌ له‌ رۆژی شه‌هیدانی پارتی ئازادیی کوردستاندا یادی هه‌موو شه‌هیدانی کوردستان به‌خێر دێنین. یادی باقی رێبه‌ره‌ شه‌هیده‌کانی کورد به‌خێر دێنین. یادی د. عه‌بدوڵڕه‌حمانی قاسملوو به‌خێر دێنین‌‌. یادی کاک فواد مسته‌فا سوڵتانی به‌خێر دێنین‌. یادی د.سادق شه‌ره‌فکه‌ندی به‌خێر ده‌ێنین‌. یادی سه‌ید عه‌بدوڵکه‌ریم حسه‌ینی به‌خێر دێنین. که‌ هه‌موو ئه‌وانه‌ هه‌رکه‌س به‌ رێگایه‌ک و به‌ گوێره‌ی خۆی، له‌ پێناو ماف و ئازادییه‌کانی ئه‌م میلله‌ته‌دا گیانیان به‌خت کرد.

   که‌ واته‌ له‌ رۆژی شه‌هیدانی پارتی ئازادیی کوردستاندا، سڵاو له‌ سه‌رجه‌م شه‌هیدانی نه‌ته‌وه‌ی کورد، له‌ هه‌ر چوارپارچه‌ی کوردستان. سڵاو له‌ شه‌هیدانی بزووتنه‌وه‌ی رزگاریخوازیی کورد له‌ رۆژهه‌ڵاتی کوردستان و له‌ ریزی هه‌ر حیزب و رێکخراوێکی سیاسییدا.

  ئێوه‌ش ئه‌ی خۆشک و برایانی تێکۆشه‌رم! ئه‌ی رێبوارانی رێگه‌ی شه‌هید سه‌عید یه‌زدانپه‌نا و ئاڵا هه‌ڵگرانی سه‌ربه‌خۆیی و به‌ ده‌وڵه‌تبوونی کورد! هه‌ر شاد بن و هه‌ر بمێنن بۆ درێژدانی ئه‌و رێگایه‌ی که‌ رۆڵه‌کانی نه‌ته‌وه‌ی کورد گیانیان له‌ پێناودا به‌خت کرد. سوپاس بۆ ئێوه‌.

تێبینی: ئەم وتانە لە رێورەسمی 18 هەمین ساڵوەگەڕی تێرۆر کرانی رێبەر و دامەزرێنەری پارتی ئازادیی کوردستان کاک شەهید سەعید یەزدانپەنا، پێشكەش کراوە.