pazadik:

ئەمڕۆ 19/6/2016، 69 ساڵ بەسەر لەسێدارەدانی "عێزه‌ت عه‌زیز، مسته‌فا خۆشناو، خه‌یروڵڵا عه‌بدولكه‌ریم و محه‌ممه‌د مه‌حمود  قودسی"، چوار ئەفسەر و چوار پارێزەرە مەزنەکەی دەوڵەتی جمهووریی کوردستان، کە بەدەستی دەوڵەتی خوێنڕێژی ئەوسای عێراق شەهیدکران، تێدەپەڕێ.

لەو سەردەمەدا کە پێشەوای مەزنی کورد پێشەوا قازی محەمەد و هاوڕێکانی، بڕیاری دامەزراندن و بنیاتنانی کیانێکی کوردییان لە رۆژهەڵاتی کوردستان دا و دواتر دەوڵەتی جمهووریی کوردستان راگەیەندرا، بۆ پشتیوانی و بەرگریی لەو دەسکەوتە مێژووییەی نەتەوەکەمان، هێزێکی گەورە بە سەرۆکایەتی ژێنێڕاڵ مستەفا بارزانی لە باشووری کوردستانەوە بەرەو کۆماری کوردستان رێکەوتن. چوار ئەفسەرە مەزنەکەش لە ریزی ئەو هێزەدا بوون.

لە ماوەی 11 مانگی کۆماری کوردستان و تا رووخانیشی، هێزەکەی بارزانی بەگشتی و چوار ئەفسەرەکە رۆڵێکی کاریگەرییان لە پاراستنی کۆمار و راهێنان و مەشقپێکردن بە هێزە سەربازییەکەیدا هەبوو، بەجۆرێک کە پێشمەرگەکانی کۆماری کوردستان لە هیچ جەنگێکدا شکستیان نەهێنا. پاش رووخانی دەوڵەتی جمهووریی کوردستان، چوار ئەفسەرە مەزنەکە گەڕانەوە بۆ باشووری کوردستان و لە لایان دەوڵەتی ئەوکاتی عێراقەوە قۆڵبەست و رەوانەی زیندانی بەغدا کران و سەرەنجام بەتۆمەتی بەشداریی لە شۆڕشی بارزان و دامەزراندنی دەوڵەتی جمهووریی کوردستان، لە 19/6/1947 دا ھەرچوار ئەفسەرەکەی کورد لە بەندیخانەی بەغداد لەسێدارە دران.

ئێستا و پاش تێپەڕینی 70 ساڵ بەسەر دامەزراندنی کۆماری کوردستان و 69 ساڵ بەسەر شەهیدکرانی چوار ئەفسەرەکەدا، جارێکی دیکە مێژوو دووبارە دەبێتەوە، ئەمجارەیان رۆڵەکانی رۆژهەڵاتی کوردستان هاوشێوەی چوار ئەفسەرەکە و هێزەکەی بارزانی، لە ژێر فەرماندەیی ژێنێڕاڵ حسەین یەزدانپەنا، لە سەنگەرەکانی هەرە پێشەوی شەڕ دژی داعش و پارێزگاریی لە خاک و خەڵک و دەوڵەتی کوردستانن.

رۆڵە چاونەترسەکانی رۆژهەڵاتی کوردستان لە ریزەکانی پارتی ئازادیی کوردستان، خوێن و ئارەقەیان تێکەڵ بە براکانیان لە باشووری کوردستان بووە و بۆ پاراستنی دەسکەوتەکانی، خوێنی هەشت رۆڵەی ئازا و چاونەترسی لەو پێناوەدا رژاوە و پتر لە 30 برینداری داوە.

هەزاران سڵاوی و ئەمەگ وەفا پێشکەشی پێشەوای مەزنی کورد پێشەوا قازی محەمەد و چوار ئەفسەرەکەی دەوڵەتی جمهووریی کوردستان و سەرجەم شەهیدانی رێگای ئازادیی و سەربەخۆیی کوردستان.