بۆ سەرکردەی شەهیدم
17/9/2016
کاکەڕەش لاجانی
ئه‌ستێره‌ی کارون کوژه، هه‌روا به ئاسمانی ڕه‌شه‌وه، گرشه گرشی ده‌هات، که خاون باڵی به هێزی رێی ئاوات هات و هه‌واڵی دڵته‌زێنی شه‌هید بوونی رۆڵه‌ی هه‌ڵکه‌وتووی گه‌ل و رێبه‌ری گه‌شتی و دامه‌زرێنه‌ری PAK، کاک سه‌عید یه‌زدانپه‌نایان پێداین. دیسان داخێکی دیکه که‌وته نیۆ دڵی خه‌ڵکی کوردستان و خه‌مێکی دیکه ژانی خسته سه‌ر دایکی نیشتمان، ره‌نگی سروشت زه‌رد هه‌ڵگه‌ڕا، کێوه به‌رز و گه‌رده‌ن که‌شه‌که‌ی ته‌ره‌غه، به بیستنی ئه‌و هه‌واڵه، ده‌نگی دایه‌وه و به به‌رزایی لوتکه‌ی سه‌ری هاواری کرد و ووتی: رێبه‌ره‌که‌م به‌رگی سوورت لێ پیرۆز بێ، دڵنیابه تازیه‌ی ره‌شت بۆ ناگرین ، ئاخر ئێمه له مێژ ساڵه ڕۆژێکی وان له به‌رچاو بوو، به‌دڵ و به گیان بۆ ئه‌م رۆژه گه‌وره‌ن کردی ، تا بتوانی سه‌ری به‌رزن، هه‌روا به به‌رز راگری و به ره‌نگی سووری خوێنه‌که‌ت ، یاقووته سووره‌کانی تاجی سه‌رمان زیاتر بکه‌ی ، نانا تازیه‌ت بۆ ناگرم، چۆن ده‌زانم سه‌دان رۆڵه‌ی ئازای دیکه‌ی وه‌ک توم هه‌یه ، که ئامانجت وه‌دی بێنن و هه‌وری ره‌شی خه‌مو خه‌فه‌ت له سه‌رسه‌رم بڕوێینن. تازه سیواد ئه‌نگوتبوو که لالوی پیری ره‌زه‌وانی دڵ به خوزیا ، ئه‌و هه‌واڵه‌ی به گوێ گه‌یی ، ئاوی کانیاوی چاوی به نێو جۆگه‌له ورده‌کانی روومه‌تی داهاتنه خوارێ و له‌بانگی‌دا ، ئه‌وجا به یادی جوانه مه‌رگه‌که‌ی له نێو ره‌زدا ، پڕ دێراۆیک گوڵی لێدا. که رۆژهه‌ڵات ، لاوه نیشتمان په‌روه‌ره‌کانی کوردستان و رێبوارانی به ئه‌مه‌گی رێی ئازادی ، هێنده‌ی دیکه ئاگری قین و تۆڵه له نێو دڵیان دا بڵێسه‌ی هه‌ستاند و په‌یمانی تا سه‌ر وه‌فادارییان له‌گه‌ڵ شه‌هید سه‌عید و هه‌موو شه‌هیدان نۆی کرده‌وه . تارمایی شه‌و باڵی به سه‌ر وڵاتدا کێشا ، نه‌نه‌ی پیر و باوکی پیری ژێر سه‌ری نه‌وکانیان له سه‌ر کوشیان دانا بوو، به‌چاوی پڕ ئه‌سرینه‌وه داستانی راسته‌قینه‌ی ئه‌و جارشیان بۆ گێرانه‌وه تووی دلێری و ئازادیخوازییان له نێو دڵی نه‌و نه‌مامه‌کانیان داچاند. دیسان ئه‌ژنۆکانیان له باوش گرته‌وه چه‌ند دڵوپ فرمێسکی گه‌شی دیکه‌شیان بۆ پاراو کردنی تووه‌کانیان وه‌راند. هه‌ر به‌م شێوه‌یه رۆژهاتن و مانگ تێپه‌ڕین و ئێستا ساڵرۆژی وه‌رینی گوڵی ژینی شه‌هید سه‌عید رێز ده‌گرین. له‌گه‌ڵ بیستنی هۆره‌ی خۆشی خوانان که بۆ هه‌میشه ناوی کاک سه‌عیدیان له نێو خویان جێ کردوه‌ته‌وه و له‌گه‌ڵ هه‌ڵژینی بۆنی گوڵی روواوی سه‌ر گڵکۆی یه‌ک یه‌ک رسته‌کانی ته‌واو نوێنی ئه‌وینی راسته‌قینه‌ی به ده‌ریا ده‌بینمه‌وه و لیۆه له تینوان ووشک بووه‌کانی دێنینه‌وه به‌رچاو که ئه‌م ووشانه‌یان وه‌ک ده‌سته‌ی کۆتری سپی له‌سه‌ر هه‌ڵده‌فڕی و به‌ره‌و ئامێزی دۆستی هه‌میشه وه‌فاداری یانی ته‌خته به‌رده‌کانی کێوانی کوردستان، هه‌وای ته‌م هێنه‌ریان ده‌بڕی و له سه‌ر سه‌ری سه‌رداران و کۆڕی یاران هه‌ڵده‌نێشن. من وا ده‌ڕۆم خۆشه‌وێستان بۆم نه‌گرین، تازییه‌م ناوی، ڕه‌ش فڕێ ده‌ن ئه‌و سوورایه‌ی خوێنی گه‌شی هه‌زاران رێبواری رێمه، ئه‌و خاکه‌ی وا بۆ هه‌مێشه دڵی جێمه، له ڕه‌ش پۆشان و ڕه‌ش دۆشان، گه‌لێ بێ زار و زۆر قه‌ڵسم بۆمان له چه‌نگ زۆرداری هار، ڕژانی خوێن، پاراستنی خاک و گه‌لی خاوه‌ن ماڵ و دلێر و ئازا پێوێسته، داوا له فڕێشته‌ی ژینم ده‌که‌م، به دوو باڵی سپی و ئاڵی، هه روا وه‌فادار بمێنی و پێ یان بڵێ ئاسۆ ڕوونه و سه‌نگه‌ری ئازادی سه‌خته، بۆ ژێنی پڕ له ئازادیی سه‌ر و گیان بازی پێویسته، دایکم نابێ بۆ من بگری و ماتم بگرێ، خۆ ده‌زانێ، ده‌بێ ڕۆڵه‌یان یا سه‌ربه‌ست بێ، یان بۆ وڵات سه‌ر ببردرێ. دیسان ده‌گه‌ڵ په‌یمانی وه‌فاداری، به رێبازی ده‌ڵێین؛ شه‌هید سه‌عید وه‌فاداریت به دوو دایک روون و روونترخۆ ده‌نوێنێ ، ئه‌و دایکه‌ی وا شیری پێ دای ، خوێنت بۆ دا ، ئه‌و دایکه‌ی وا ده‌رسی پێ دای، ژینت بۆدا. راسته کۆشی دایکی پیرت له‌گه‌ڵ هه‌زاران تاسه و ئاوات و بیره‌وه‌ریی جێ هێشتووه ، ئه‌و دایکه‌ی دی گه‌رم له باوشی گرتووی ، تا هه‌تایه ده‌ت لاوێنێ و داستانی رێگه‌ی درێژه‌دانی هاورێیانی تا سه‌ر وه‌فاداریت دێنێته خه‌و و بزه‌ی شادیت ده‌خاته لێو ، نانا خه‌م نه‌ت گرێ هیچ کات دایکت تازیه‌ی ره‌شت بۆ ناگرێ ، هاویینان کراسی سپی ده‌خاته سه‌ر سه‌ر و چین چین پشتێندی سوور ده‌به‌ستێ ، ناهێڵی نا ، دوژمنی ژین ، باڵی مه‌لی هیوا بپه‌ڕێنێ و کۆتایی به تاسه‌ی دڵی له کوڵی پارێزه‌رانی سه‌نگه‌ری کێوینی کورد و ئازادیی بێنێ. بۆ ئه‌وه‌ی داڵه پیرو باڵ شکاوه‌که‌ی جه‌ماران و دارو ده‌سته‌ی بزانن، ئه‌گه‌ر رؤڵه‌یه‌کی وه‌ک سه‌عید له داوێنی ته‌ره‌غه بڕا ، ده‌یان سه‌عیدی تر له قوتابخانه‌که‌ی په‌روه‌رده کرا، وه‌ک خوێن گرو ماف وه‌رگری هه‌ڵده‌ستن و ناوه‌ستن.
|