بــــەشداریی و ڕۆڵی کاریگەری هێزەکانی (پارتی ئازادیی کوردستان) لە بەرەنگار بوونەوەی تیرۆرو بەگژداچوونەوەی هێزی تاریکپەرست و پەلاماردەری دەوڵەتی خەلافە ناسراو بە (داعــــش) بۆ سەر کــوردستان، دەنگدانەوەیەکی گەورەی ناوخۆیی و ناوچەیی و جیهانی لێکەوتەوەو ئەوەش بو بە هۆی ئەوەی کە لە وڵاتە جۆراوجۆرەکانی وەک کانادا،ئامریکا،بەریتانیا،نۆرویژ،سوئێدو... خەڵکانێکی زۆر ڕو بکەنە ئەو پارتەو پەیوەست بە ڕیزەکانی (پــــــــاک) ببن و دوای ئاشنا کردن و تێگەیاندنی زیاتریان لە دۆزی نەتەوەیی کورد لە لایەن ئەو پارتەوە، ئەگەر بڵێیین لە کوردێکی ڕەسەن زیاتر دڵسۆزی و خەمخۆری بۆ گەل و خاکی کوردستان دەکەن، هیچ زیادەڕەویەکمان نەکردوە.
هەر لەو میانەشدا بەردەوام ڕۆژانە میدیا ناوخۆیی و جیهانیە بەناو بانگەکانی وەک (ڕویتەرز،بی بی سی،دویچە ولە، ئەلعەرەبییەو...) لە نزیکەوە سەردانی سەنگەری پێشمەرگە سەربەخۆییخوازو گیانلەسەردەستەکانی (پارتی ئازادیی کوردستان)یان کردوەو دەیکەن.
بە داخەوە بەرچاوتەنگیی،کێشەی کەسیی و بیری تەسکی حیزبایەتیی هەندێک کەس و لایەنی کـــــوردستانی چاویان بە پێشکەوتنەکانی سەربەخۆییخوازانی (پــــارتی ئازادیی کوردستان) هەڵنایەت و تا ئەو جێگایەی بۆیان بکرێت بە هەموو شێوەیەک دژایەتی دەکەن و هەوڵ دەدەن لەبەرچاوی کۆمەڵانی خەڵکی کـــوردستان ناشیرین و بچووکی نیشان بدەن، بێخەبەر لەوەی کە بەری خـــــــۆر بە بێژینگ ناگیرێ.
دوابەدوای بڵابونەوەی ڕاپۆرتێکی هەواڵنێریی (ڕویترز) هێمن سەییدی کە پێشتر ئەندامی ڕێبەریی حیزبێکی ڕۆژهەڵاتی کوردستان بووەولە ئێستادا وەک "چالاکێکی سیاسی و لێکۆڵەرەوەیەکی سەربەخۆ" دەردەکەوێ و دانیشتوی وڵاتی بەریتانیا،یە، کێچ کەوتۆتە کەوڵی و لە ڕێگەی نووسین لە لاپەڕەکەی خۆی لە تۆڕە کۆمەڵایەتیەکاندا، بە تەواوی کەوتۆتە چەواشەو لاڕێ کردنی ڕاپۆرتی ئاماژە پێکراو و قین لە دڵی و بوغزو کینەیەکی تەواو لە ناو قسەکانیدا بەرامبەر بە (پـــــــاک) بە زەقی بەرچاو دەکەوێت و هەست پێدەکرێت.
لێرەدا بە پێویستی دەزانم بە بەڕێزیان بڵێم کە (ئاغای سەییدی) نەدەبو لەو دورەوەو بەبێ لێکۆڵینەوەی ورد و مەیدانیی، تیر بە تاریکاییەوە بنێی.
ئەو ڕاپۆرت و هەواڵانە لە نزیکەوە تۆمار کراون و پێتان وانەبێ پـــەیامنیری ئەو ناوەندە بە ناوبانگە جیهانیانەش وەک بەڕێزتان هەر ئاوا گۆترەواریی و بەبێ زانیاریی و لێکۆڵینەوەی ورد، ئەو ئامارو داتایانەیان بۆ ناوەندەکانی خۆیان ناردبێت و ناوەندەکانیشیان هەر ئاوا بە سادەیی بڵاویان کردبێتەوەو بیرێکیان لە پێگەی بڕواپێکراوی خۆیان نەکردبێتەوە.
سەنگەرو مەقەڕ و پایەگاو بنکەکانی (پــــــــاک) بە پێچەوانەی هەندێک لە لایەنەکان، هەردەم بە ڕوی میدیاکاندا کراوە بون و هەن، جەنابیشتان پێش ئەوەی توڕەبون و هەڵچون و کەف و کوڵ کردنتان بکەن بە نوسین و بڵاوی بکەنەوە، بۆ کەسایەتی خۆتان وا باشتر بو ئەگەر خۆشتان زات ناکەن لە بەرەکانی جەنگ نزیک ببنەوە، لانیکەم راسپاردەیەکی تایبەت بە خۆتان بەکرێ بگرتایەو بتانناردبا بۆ ئەو میحوەرو ناوچانەی کە هێزەکانی (پارتی ئازادیی کوردستان) لێی نیشتەجێن و ڕاپۆرت و لێکۆڵینەوەیەکی ورد و تێروتەسەلی بۆ ئەنجام دابای ، ئیدی ئەوکات ئەگەر ئیددیعاکانتان ڕاست بوایەن، دەتان توانی پارەیەکی باشی پێ لە میدیاکان وەربگرن و بەوجۆرە قازانجێکی باش بکەن.
خـــۆزگە جەنابی (ســــەییدی) سەرچاوەیەکی ئەگەر بچووکیش بایە بۆ ئیددیعاکانی کە دەڵێ (باش ئاگادارم، باش دەزانم و...) بهێنابایەوە. بە تایبەتی بەڕێزیان کە لە وڵاتێکی ئوروپایی دەژین ئەوە باش دەزانن کە ئیددیعای بێ بەڵگە، هیچ نرخێکی نییەو کەس بە تورێکی قوڕاویش نایکڕێت.
نازانم کەش و هەوای سازگاری (لـــەندەن)، دوریی لە ژیانی توێژە جیاجیاکانی کۆمەڵگای کوردەواری یان بەرچاوتەنگی و خۆبەزلزانینی بەڕێز (ســـەییدی) وای لە جەنابیان کردوە کە هاتن و ڕوکردنیی پۆل پۆل کچ و کوڕی ڕۆژهەڵاتی نیشتمان لە سەنگەری سەربەخۆییخوازی بە پێشەنگایەتی(پارتی ئازادیی کوردستان) نەبینێ و هەست پێنەکا؟؟؟!!!
ئاغای (ســــەییدی) ئەگەر نەتانزانیوە ئەوە بزانن کە ئەو ڕۆژهەڵاتەی ئێوە لێیەوە هاتوون ئێستا لەگەڵ سەردەمی ئێوە زۆر زۆر گۆڕاوەو کەمتر بنەماڵەیەک هەیە کە کەسێکی لیسانس یان فوق لیسانسی نەبێت، پێتان وانەبێت کە ئێستاش وەک قەدیم بە ئاسانی دەکرێ خۆڵ لە چاوی خەڵک بکرێت، جیلی تازەپێگەییشتوی ڕۆژهەڵات
دەخوێنێتەوە،لێدەکۆڵێتەوەو کەمتر وایە کوێرکوێرانە و سوننەتیانە بڕوانێتە دەوروپشتی خۆی، بۆیە نابێ پێتان وابێ کە دەبێ حەتمەن بەو ڕێگەو ڕێچکانەدا بڕۆن کە پێشتر دیاریکراون!
ئاغا (هــــــێمن) گیان پەرەسەندنی بیرو هەستی سەربەخۆییخوازی و ڕوحی نەتەوەیی لە ناو تاکی کورددا بە تایبەتی لە ڕۆژهەڵاتی کــــوردستان، بابەتێکی چاوپۆشی لێنەکراوەو هەرکەس بیهەوێت ئەو ڕاستیە پەردە پۆش بکات وەک ئەوە وایە بە پێچەوانەی ڕوبارێکی گەورەی پڕخرۆش مەلە بکات.!
من پێشتر زۆر گرینگیم بە ڕاوبۆچونەکانی بەڕێزتان دەداو وامدەزانی سەرچاوەی قسەکانتان بە بەڵگەوە پشت بەستوون، بە داخەوە دوای دیتن و بیستنی ئەو بابەتەتان کە خۆم لە نزیکەوە لە راستی و ناڕاستی ئاگادارام، گوومانم لەوانەی پێشووشتاندا بۆ دروست بو.
تێبینی:
یەکەم:نووسراوە فارسیە پێوەندیدارەکەی ئاغای (ســــەییدی) لە کۆمێنتی یەکەمدا دانراوە.
دووهەم: هیوادارم کاک هـــــێمن دوای دیتنی ئەو نووسراوەیە منیش لە لیستی هاوڕێکانی دەر نەکا و بلۆکم نەکات. چونکە تا ئێستا هەر هاوڕێیەکی ئێمە کۆمێنتی بۆی نوسیبێ، لە لیستی هاوڕێکانی دەری هێناوەو بلۆکی کردوە.
ـــــــــــــــــــــــــــــــــــ
بە هێنانەوەی چوارینەیەکی خەییام کە وێکچوونیکی زۆرو پێوەندیداری بە بابەتەکە تێدا دەبینم، لێرەدا کۆتایی بەو بەشە لە نووسینەکەم دەهێنم:
خشتپێژی ھەتا کەنگێ بەسەر دەریاوە
ئاخ چەندە ڕقم لە بتپەرس ھەڵساوە!
کابرای کە دەڵێ دەچتە جەھەندەم خەییام
چۆن زانی؟ چ دێوێک خەبەری پێداوە؟!
ـــــــــــــــــــــــــــــــــــــــ
ڕێــــــبوار ئـــــەحـــــمەدزادە