کەم نین ئەو مرۆڤانەی ئازادیخوازن لە ڕۆژهەڵاتی وڵات ، کەم نین ئەو هەمو هێز و لایەنی سیاسی لە راست و چەپ و مامناوەندی و .... کە پێرە و پروگرامەکانیان وەک ئایەتی خوا وایە ، بەڵام بە داخەوە دوورن لە فەلسەفەی نەتەوایەتی !
حەکایەت و حەدیس و یاری بە وشە و زاراوەی بریقەداری پێویست نییە بۆ شەرە دندۆکان و پاساو هێنانەوە ، من نالێم ڕۆژهەڵاتیان یەکبگرن ، چون یەکگرتن سیل و سەرەتانە ! چون یەکگرتن نازانستی و نا علمیە ! چون گەل پێویستی بە یەکگرتن نییە لە ڕۆژهەڵاتی نەحەساوە ! چون یەکریزی دوژمن شکێن نییە ! چون یەکبون بە دڵە جاش قەڵەم و کرمی کتێبانیە ! بەلام هۆ برا و خوشکینەی ئازادیخوازم ، هۆ لایەنگەلی سیاسی پسپۆڕ و دانام ، لانی کەم بە بیانوی ناپەسەند پشت لە پێوەندییە کۆمەلایەتیەکان مەکەن ، پشت لە مرۆڤ ویستی مەکەن .
ئێوە و هەمو جیهان دەزانێ لە ڕۆژهەڵاتی ناوین ، تاکە گەلێک کە بە هەمو تواناوە و بە درێژایی مێژوو ، دژی جەهل و نادانی و داگیرکەران وەستاوەتەوە و بە بەردەوام قوربانی بۆ دەدا ؛ گەلی کـوردە . ئەم بەرخۆدان و قوربانیانە لە مێژوو دا بە ناوی ئەم لایەن یا ئەو لایەن پێناسەی بۆ ناکرێ بەلکو بە ناوی گەل دێتە ئەژمار و لە مێژوودا خۆ دەنوێنێ . دەزانن و ئاگادارن لەم ڕۆژە چارە نوس سازەدا شەری داسەپاوی درندەترین دوژمنی ئازادی ، واتە داعش بە هەر دوو دیوەکەی ( داعشی شێعە و سونە ) دەرگای بە کورد گرتوە و بە داخەوە هەزاران شەهید و بریندار و ئاوارە و یەخسیری لێ کەوتوەتەوە . دیارە بە ئاشکرا چەقی مەیدانی شەر لە باشور و ڕۆژئاوای وڵاتە بەلام لە واقع لە لایەن داعشی شێعەوە ڕۆژهەڵاتی وڵات وا نزیک بە ٤ دەیەییە خوێنی لە بەر دەچورێ .
لە گەرماگەرمی ئەو شەرە مەیدانییە داسەپاوە بە سەر کوردان ، تاک و لایەنی سیاسی ڕۆژهەڵاتی وڵات بە پێی ئەرکی سیاسی ، ئەخلاقی ، ئازادیخوازی ، نەتەوەیی بە پێی توانا زیاتریش سەرباری ئاستەنگی زور ، نەبونی ئیمکانات و هتد بەشداری ئەو شەرە مەزنە بوون و بە داخەوە بەیندار و قوربانیان داوە . ئایا جیهان چۆن ئەو واقعانە دەبینی ؟ ئایا حکومەتی هەرێم چۆن ئاور دەداتەوە ؟ ئایا پاشە شکانی داعش و راونانیان رۆل و دەوری هێزی ڕۆژهەڵاتی چۆن دەبێ ؟ و زورپرسیارگەلی دی لە ئارایە . ئەوەی کە لە هەموی گرنگترە و جێگەی سەرنج و ئاوردانەوەیە ئەوەیە :
ــ ئازادیخوازانی ڕۆژهەڵاتی بە بایەخەوە دەنوارنە ئەو پێگە و دەور و بەرپرسیارەتیەیان ؟
ــ ئازادیخوازانی ڕۆژهەڵاتی لە رەوانگەی حیزبایەتیەوە بە تەسک کردنەوەی ئەو واقعە و بەشدار بوونە و قوربانیدانە دەنوارن یا لە رەوانگەی بەرزی نەتەوایەتی و نیشتمانپەروەری ؟
بە داخ و کەسەرەیەکی زورەوە هەتا ئەم چرکە ساتە ، نەک ئاوردانەوەیەکی زانستی و ئاکادیمی لە ولامی ئەو پرسیارانە نەدراوەتەوە ! بەلکو لە درێژەی پاشەلخوری و بیری سەقەت و نانەتەوەیی بە مەیدانی پشت دەکرێتە تەنانەت پێوەندییە کۆمەلایەتیەکان !!! کێ بەرپرس و وڵامدەرە ؟
بۆ منێک وەک تاکێکی کورد ئەوە جێگەی پرسیار و گازەندە و رخنەی توندە لە هەموان بە گشتی کە ؛ ئێوەی ڕۆژهەڵاتی هیچ شەک و گۆمانتان لە ئازادیخوازیتان ، هەولتان ، قوربانیان و هتد بۆ کەس نەهێشتوەتەوە و بەردەوامن لە ئەرکی پیرۆز ، بەلام بە داخەوە بۆ دەبێ : بە بیری تەسکی حیزبی راستەخۆ لە بایەخی و روول و پێگەی ڕۆژهەڵاتیان دادەبەزێنن ؟؟!!!!
بە راشکاویەوە دەلێم :
ـــ دەک دەرگەی ئەو سیاسەت و بیروکەیە بە قور گیری گەر دەمکاتە دژی ؛ برا و خۆشک و خزم و کەسکار و نەتەوەکەم .
ـــ دەک دەرگەی ئەو سیاسەتە بە قور بگیری کە ؛ پیرۆزییە کۆمەلایەتییەکان لە ناو دەبا .
تا کەی مرۆڤی ئازادیخوازی ڕۆژهەڵاتی لە سەرویانەوە لایەنە سیاسیەکان بە شێوازێکی گشتی لە خۆ ورد نابینەوە ؟ ئامانج و ستراتیژیان بە ئاشکرا و بە مەیدانی رەچاو ناکەن ؟ سەرەتایترین چەمکی ئازادی و دیموکراسیەت پیشە ناکەن ؟
ئێوە هەر هەموتان باش ئەوە دەزانن کە ؛ ڕۆلەی ئەم گەلە یەکەم قارتماغەی هزری تێکوشان و چالاکی و قوربانی بوونی لە کوردستان لە دژی جەهل و نادانی کــــــــــورد بوون و هەستی نەتەوەییە و پاشان خۆ لەم حیزب یا ئەو حیزبدا دەبینێتەوە . دەبینین لەو شەرە داسەپاوە و هەستیارە و چارەنوس سازەدا ڕۆلەکانمان شەهید و بریندار دەبن ، گەر بە ئەقلیەتی نەتەوەیی ، گەر بە پابەندی پێوەندی ئەخلاقی و کۆمەلایەتی بین لەم سونگەوە بروانینە بابتەکان ، بۆ منی هەندەران نشین چی تێناچێ هەلگرم بە پێوەندیکی تەلەفونی رێز و حورمەتم بۆ بنەمالەی شەهیدان دەربرم ، بە پێوەندی کردنم دڵی بریندارەکانم خۆش کەم کە رێز و حورمەتیان لامان هەیە ، لە تورە کۆمەلایەتیەکان قەدردانی و پێزانینم کەمە پیشە بێ جیاوازی . ئەم سەرکردەی ئەملا و ئەو سەرکردەی ئەولا بە بەسەر کردنەوەی بنەمالەی شەهیدان ، برینداران . ئەرکی ئەخلاقی و مرۆڤ ویستی بەجێ گەیاندوە ؟ هنگاوی وا نەک کەمی نییە بۆ حیزبەکەی بەلکو بە پێچەوانە شکوداری و بەرپرسایەتی حیزبەکەی بە مەیدانی نیشانداوە .
کاکی ئازادیخواز و بە ناو بەرپرس بە ناوێکی زلەوە لێ وەرکەوتوە و بەیانامە دەر دەفەرمێ و باسی هەزاران کیلومتر دور لە خۆی دەکا و سینگی بۆ دەردەپەرێنی و داکوکیان لێ دەکا ، بەلام لە تەنیشتی خۆی کوێر و کەرە کە زەحمەتی وە وەبەر خۆ بدا سەردانی بنەمالەی شەهیدی ڕۆلەی گەلەکەی بکا ! سەردانی برینداری گەلەکەی بکا کە لە شەری جەهل و نادانی پێکراوە ! یا لە بە خاک سپاردنی پێناسەی گەلەکەمان بەشدار بێ !!!
کاک و خۆشکی ئازادیخوازم کە دەنگ و قەلەمتان گوێی دنیا کەر دەکا و لە داوی پاشەلخۆری کەوتون و مەستی خەیالاتی بیروکەی سەقەتی ئیسم و میسمانن . ئەو شەهیدانە بە تێکرا ڕۆلەی گەلی کوردن و شەهیدانی کوردستانن و بالایان بەرزە بە قەت کوردستان ، نەک مالی حیزبان و قەتیس کردنیان لە ئاستێکی بچوکی حیزبی . پێشمەرگە سۆمای چاوی گەلی کوردن و بریندارانی ، زامی جەستەی گەلە ، با بۆ چرکە ساتێ لە خەیالان دور کەوینەوە و تەنیا ئاورێک لە پێوەندییە کۆمەلایەتییەکان بدەینەوە . تۆی بەرپرس و سەرۆکی ئەم یا ئەو حیزبان سەردانی بریندارانی ڕۆلەی گەلەکەت بکەی کە لە سەردەمی ململانێی مان و نەمانە ، بینین و سەردانی بەرفراوان بۆ لای ئەو ئازیزە بەقەدەر نەشتەرگەری و ئەرکی پزشکی لە روح و جەستەی کاردانەوەی دەبێ ، کەی شعور بەوە دەکەین ئێمەی فەیلەسوف ؟! کاتێ سۆمای چاو ، پێشمەرگەیەکی بریندار، شەر لەگەل مان و نەمان دەکا ، ببینی ئەم یا ئەو بەرپرس و سەرۆکی حیزبان بە بێ گوێدانە بیروکەی سیاسی مەزنترین وزە و هێزی دەدەیتێ ، بە واتای بەو سەردانە ؛ گیانی مرۆڤێ لە ململانێی مان و نەمان بەهێزتر دەکەی . خۆشەویستی و مرۆڤ ویستی بە مەیدانی لە کۆمەلگا پەرە پێی دەدەی کە سەد قاتی بەیانامە و قسەی زل و بریقەدار بایەخی هەیە . هەر لە تاکەوە تا دەگاتە لایەنی سیاسی ئەرکە و پێویستە بەخۆدا بچنەوە و بیری ئازادیخوازیان ، نەتەوەییان بەرفراوانتر بکەن .
ئێستە بە داخ و کەسەرەیەکی زورەوە دوو شێرە کچی تەوار ئاسای ڕۆژهەڵاتی وڵات کە لە ریزەکانی پارتی ئازادی کوردستان ، لە شەری جەهل و نادانی بە سەختی بریندار و لە سەر تەختی نەخۆشخانە چاو بە مولەق ململانێ مان و نەمان دەکەن ، با بە پێوەندیمان وەک تاک ، با بە سەردانمان وەک بەرپرس و سەرۆکانی حیزبان بە هانایانەوە بچین و دوعاکان بە کردوەی مەیدانی ومرۆڤ ویستانە وەگەر بخەین . ئەو شێرە کچانە لەم کاتەساتەدا ، لە ئازاری لێدانی دڵ و جەستەیان ، باوک ، دایک ، خۆشک ، برا ، خزم و کەسیان ئێوەن و لە ئاستی دەرونیەوە چاویان لە رێی هەریەکەتانە ، گەر بیری سەقەت ، گەر پاشەلخۆری ، گەر مێژووی چەواشەکراو ، گەر ..... وەلا بنێن و لە سەرەتایترین پێوەندییە کۆمەلایەتیەکان ئاور بدەنەوە ، هنگاوەکانی خۆ دوزینەوە خێراتر دەبێ و لە ئامانج نزیک دەبینەوە ، گۆرانکاری لە ئاسمانان نییە دەستمان پێ رانەگات و .........
بە هیوای ئاوردانەوەی هەمو لایەک بەتایبەتی وەستاکانمان و ناوی و یادی شەهیدان بەرز و بەرێز و تەمەنای شفای بە پەلەی بریندارە خۆشەویستەکانی لەشکری پێشمەرگەی کورد و کوردستان بە تایبەتی ڕۆژهەڵاتی خێر نەدیتوم .
حەمەی شاسواری
٠٨ / ١١ / ٢٠١٦