فه‌رمانده‌ی گشتی هێزه‌کانی PAK پێشوازی له شاندێکی GENEVA CALL کرد
22/4/2015
pazadik:L
پێشنیوه‌ڕۆی سێشه‌ممه رێکه‌وتی 21 ئاپریلی 2015، حسێن یه‌زدانپه‌نا فه‌رمانده‌ی گشتی هێزه‌کانی پارتی ئازادیی کوردستان به به‌شداری ئه‌فشار ئه‌قده‌سی ئه‌ندامی کۆمیته‌ی ناوه‌ندی PAK، پێشوازی کرد له خاتوو Elisabeth Decrey، سه‌رۆکی دامه‌زراوه‌ی GENEVA CALL و شاندی هاوڕێی. له‌م چاوپێکه‌وتنه‌دا، سه‌رۆکی GENEVA CALL، کورته‌یه‌کی له مێژوو و ئامانج و تێکۆشانی رێکخراوه‌که‌یانی پێشکه‌ش کرد. فه‌رمانده‌ی گشتی هێزه‌کانی PAK، وێڕای پشتیوانی له حه‌وله‌کانی ئه‌و رێکخراوه ئه‌و راستییه‌ی روون کرده‌وه که بزووتنه‌وه‌ی رزگاریخوازیی نه‌ته‌وه‌ی کورد له رۆژهه‌ڵاتی ناوه‌ڕاست دا بزووتنه‌وه‌ی ئازادیخوازیی ئینسانییه که هه‌میشه به ته‌نگ پاراستنی مافه‌کانی مرۆڤه‌وه بووه و ته‌نانه‌ت له جه‌نگه‌ی شه‌ڕیشدا به کرده‌وه، به‌ڵگه‌نامه و رێکه‌وتننامه جیهانییه‌کانی پێوه‌ندیدار به شه‌ڕ و تێکهه‌ڵچوونه چه‌کدارییه‌کانی، ره‌چاو کردووه و هه‌میشه دژ به تیرۆر و ره‌شه‌کوژی بووه. یه‌زدانپه‌نا، هه‌روه‌ها وه‌بیر شاندی میوانی خسته‌وه که، به پێچه‌وانه‌ی کورد و پێشمه‌رگه، ئه‌و ده‌وڵه‌تانه‌ی کوردستانیان داگیر کردووه، ده‌ستیان له هیچ تاوانێک نه‌پاراستووه وخۆیان له کوشتنی ژن و منداڵ و پیر و په‌ککه‌وته‌ی کوردیش نه‌پاراستووه. هه‌ر له‌م پێوه‌ندییه‌دا فه‌رمانده‌ی گشتی هێزه‌کانی PAK رایگه‌یاند که بێ ده‌وڵه‌تی کورد، رێخۆشکه‌ر بووه بۆ ئه‌وه‌ی ئه‌و ده‌وڵه‌تانه، به ئاسانی په‌لاماری تاک و کۆی کورد بده‌ن و تووشی شه‌ڕ و کاره‌ساتی بکه‌ن. هه‌ر له‌م چاوپێکه‌وتنه‌دا خاتوو Elisabeth Decrey داوای له پارتی ئازادیی کوردستان کرد بچێته ریزی GENEVA CALL و به‌ڵگه‌نامه‌کانی واژوو بکا. سه‌رۆکی GENEVA CALL بۆ ئه‌م مه‌به‌سته یه‌زدانپه‌نای بۆ ژنێف بانگهێشت کرد. فه‌رمانده‌ی گشتی هێزه‌کانی PAK له وڵامی داواکاریی و بانگهێشتنه‌که‌دا، رایگه‌یاند که: له داواکارییه‌که‌تان ده‌کۆڵینه‌وه به‌ڵام له‌به‌ر سه‌رقاڵیم به شه‌ڕی داعشه‌وه، له‌م هه‌لوومه‌رجه‌دا کوردستان و سه‌نگه‌ره‌کانی پێشمه‌رگه جێناهێڵم و ئه‌و رێوڕه‌سمه ده‌بێ له نزیک به‌ره‌کانی شه‌ڕ بگیرێ. له دوا ته‌وه‌ری ئه‌و چاوپێکه‌وتنه‌دا دۆخی به‌ره‌کانی شه‌ڕی پێشمه‌رگه و داعش تاوتوێ کرا و پاشان شاندی میوان به‌رێزه‌وه به‌رێکران. پارتی ئازادیی کوردستان کۆمیته‌ی راگه‌یاندن
|