سەردانی لێژنەی ئامادەکاریی سێهەمین کۆنفرانسی نەتەوەیی لاوانی چوارپارچەی کوردستان بۆ لای PAK
22/5/2013
PAZADIK: کاتژمێر 11:00 رۆژی چوارشەممە 1 جۆزەردانی 2712 (22 مای 2013)، لە بارەگای سەرۆکایەتی PAK، بەڕێز حسەین یەزدانپەنا جێگری سەرۆکی PAK پێشوازییکرد لە نوێنەرانی رێکخراوەکانی بەشداربوو لە سێهەمین کۆنفرانسی نەتەوەیی لاوانی چوارپارچەی کوردستان لە کەمپی دۆمێز. سەرەتا نوێنەری لێژنەی ئامادەکاریی سێهەمین کۆنفرانسی نەتەوەیی لاوانی چوارپارچەی کوردستان لە کەمپی دۆمێز، کورتەیەکی سەبارەت بە کاروبار و بەڕێوەچوون و ئاکامەکانی کۆنفرانسی خستەڕوو و پاشان بڕیار و راسپاردەکانی کۆنفرانسی سێهەمی لاوانی پێشکەشی جێگری سەرۆکی PAK کرد. لە لای خۆیەوە وێڕای بەخێر‌هێنانی لێژنەکە، جێگری سەرۆکی پارتی ئازادیی کوردستان تیشکی خستە سەر گرینگی و بایەخی ئەمجۆرە کۆنفرانسانە لە روانگەی نەتەوەییەوە. لەم پێوەندییەدا یەزدانپەنا رایگەیاند: ئەم کۆنفرانسانە، سمبولی رمان و هەڵوەشانەوەی سنوورە دەسکردەکانی نێوان پراچەکانی کوردستان و هێمای یەکبوونی نەتەوەیی کوردە. بەڕێز حسەین یەزدانپەنا ئاماژەی بە چەند خاڵێکی گرینگ کرد، لەوانە: ئەم کۆنفڕانسە، سەرەڕای هەموو کەموکوڕییەک کە هەیبووبێ کۆنفرانسێکی سەرکەوتوو بوو. لە هەموو پارچەکانی دیکەی کوردستان خەبات لە ئارادایە و کوردایەتی لە سەدان خانەی جیاوازدا لە جووڵەدایە. باشووری کوردستان لە رووی قۆناخی سیاسییەوە لەپێشترە و لە ئێستادا لەنگەرێکە بۆ هەموو پارچەکانی دیکەی کوردستان و لەم پێوەندییەدا ئەرکی زیاتر دەکەوێتە سەر شانی رێکخراوە پیشەییەکانی باشوور. کۆنفرانسی سێهەم ئەوەی سەلماند کە سەردەمی خۆ بەستنەوە بە دەوڵەتە داگیرکەرەکانی کوردستانەوە بەسەر چووە و کۆبوونەوەی لاوانی کورد کە توێژی گرینگی کۆمەڵگای کوردەوارین لە ژێر دروشمی نەتەوەیی و ئاڵای پیرۆزی کوردستان، نیشانەی گەشەسەندنی بیری نەتەوەییانە و ئاکام و بڕیارەکانیشی سەلمێنەری ئەو راستییەن. ئێستا کە رێکخراوەکانی لاوان لە باشووری کوردستان دەرفەت و ئیمکاناتی زیاتریان لەبەردەستدایە، دەبێ ببنە هاریکار و یارمەتیدەری لاوانی پارچەکانی دیکەی کوردستان. هەروەها بە ئاماژە بە کۆنفرانسی چوارەمی لاوان کە ئەرکی رێکخستنی بە رێکخراوەکانی لاوانی رۆژهەڵات سپێردراوە، بەڕێز یەزدانپەنا وتی: راسپاردەی ئێمە بە رێکخراوەکانی لاوانی رۆژهەڵاتی کوردستان ئەوەیە کە ئەجندا و ئامانجی نەتەوەیی بۆ ئەم کۆنفرانسە لە سەرووی هەموو بەرژەوەندیی و ئەنجداکانی دیکەوە بێ. ئەگەر بەم گیانە کار بکرێ ئەوە هەر کێشە و گرفتێکی ناوخۆییش چارەسەر دەکرێ. بەڵام ئەگەر بەرژەوەندی و ئەجندای حیزبی بەسەر کۆنفراسەکەدا زاڵ بکرێ، بێگومان کۆنفرانسێکی یەکگرتووی لێناکەوێتەوە و دوورنییە، زیاتر لە یەک کۆنفرانس بەو ناوەوە ببەسترێ، کە ئەمەش دەبێتە مایەی داخ و کەسەر. لە کۆتاییدا جێگری سەرۆکی PAK، ئامادەیی مادی و مەعنەویی پارتی ئازادیی کوردستانی بۆ رێکخستن و بەڕێوەبردنی کۆنفراس دەربڕی.
پارتی ئازادیی کوردستان کۆمیتەی راگەیاندن 1 جۆزەردانی 2713 22 مای 2013
|