PAZADIK: کاتژێر 10:30 دەقیقەی رۆژی یەکشەممە 2 پووشپەڕی 2713 (23 ژوئەنی 2013)، بەڕێز حسەین یەزدانپەنا جێگری سەرۆکی پارتی ئازادیی کوردستان، بە یاوەریی هەڤاڵان شەماڵ پیران، خاتوو هامنۆ نەقشبەندی، عەبدوڵڵا نەسری، هەڵۆ رەمشتی و فەریبورز کرماشانی ئەندامانی سەرکردایەتیی PAK، پێشوازییکرد لە شاندێکی پارتی سەربەخۆیی کوردستان کە پێکهاتبوون لە بەڕێزان ئەمیر قازی سکرتێری گشتی، گۆران ئەمیری و سەلاح سوڵتانپەنا ئەندامانی سەرکردایەتی پارتی سەربەخۆیی کوردستان.

دیدارەکە چەند تەوەرێکی جێی بایەخی هەردوو لای لەخۆ گرتبوو، لەوانە بارودۆخی رۆژهەڵاتی کوردستان و پارچەکانی دیکەی کوردستان، پرسی پێوەندیی و هاوکاریی نێوان پارت و لایەنەکانی رۆژهەڵاتی کوردستان و هەڵبژاردنی سەرۆک کۆماریی لە ئێران.

شاندی میوان بە ئاماژەکردن بە چاوپێکەوتنەکانی چەند رۆژی رابردوویان لەگەڵ ژمارەیەک لە حیزب و لایەنەکان، رایانگەیاندکە  پرسی هاوکاریی نێوانیانمان خستووەتە ڕوو و هیچ لایەنێک هێڵی سووری لەبەردەم هاوکاریی خۆی لەگەڵ لایەنەکانی دیکەدا دانەناوە و سەرجەمیان پێشوازییان لەم هەنگاوە کردووە و مەبەستی سەردانەکەشمان بۆ لای PAK، هەمان مەسەلەیە.

لە لای خۆیەوە بەڕێز حسەین یەزدانپەنا، وێڕای دەسخۆشی لەم هەنگاوە، رایگەیاند کە ئێمەش هیچ هێڵێکی سوورمان نییە و ئامادەین بۆ هەرجۆرە هاوکارییەک لەو رووەوە. هەروەها پێمان باشە تاوەکوو مەسەلەکە گەرما و گەرمە و بەڵێنەکان خاو نەبوونەتەوە، با لەمڕۆ و بەیانیدا لایەنەکان کۆببنەوە.

هەر لەم پێوەندییەدا ئەندامانی دیکەی سەرکردایەتیی پارتی ئازادیی کوردستان کۆمەڵێک شیکردنەوەیان خستەڕوو.

شاندی میوان خۆشحاڵیی خۆی لە هەڵوێستی راشکاو و روونی پارتی ئازادیی کوردستان دەربڕی.

جێی بیرخستنەوەیە کە پرسی هاوکاریی نێوان حیزب و لایەنەکانی رۆژهەڵاتی کوردستان نزیکەی 10 ساڵە دێت و دەبردرێ، بەڵێنی لەسەر دەدرێ و کۆبوونەوەی بۆ ئەنجامدەدرێ، بەڵام سەرجەمیان لە کۆتاییدا بێ ئاکام ماونەتەوە و ئەم پرسە لە بە هەڵواسراوی ماوەتەوە و خەڵکی کوردستانیش بەردەوام بە شوێن دۆزینەوەی راستییە شارەوەکانی پشت دروست نەبوونی هاوکاریی نێوان لایەنەکاندا دەگەڕێن.

پارتی ئازادیی کوردستان

کۆمیتەی راگەیاندن

3 پووشپەڕی 2713

24 ژوئەنی 2013