PAZADIK: سه‌عات 17:30 ده‌قیقه‌ی رۆژی پێنجشه‌ممه‌، رێکه‌وتی 21 خه‌رمانی 2713 کوردی به‌رامبه‌ر به‌ 12 سێپتامبری 2013 ز، شاندێکی سه‌رکردایه‌تی پارتی دیمۆکراتی کوردستان به‌ سه‌رپه‌رشتی به‌ڕێز د. که‌مال که‌رکووکی ئه‌ندامی مه‌کته‌بی سیاسیی و به‌ به‌شداریی به‌ڕێزان ئه‌حمه‌د کانی ئه‌ندامی ئه‌نجومه‌نی ناوه‌ندی و به‌رپرسی مه‌کته‌بی پێوه‌ندیی نیشتمانی و کوردستانی، که‌یفی شه‌مزینی و ره‌سووڵ ره‌ز‌گه‌یی ئه‌ندامانی ئه‌و مه‌کته‌به‌، سه‌ردانی پارتی ئازادیی کوردستانی کرد .

   شاندی پارتی، له‌لایه‌ن به‌ڕێز حسین یه‌زدانپه‌نا جێگری سه‌رۆک و هه‌ڤاڵان شه‌ماڵ پیران کۆردیناتۆری کۆمیته‌ی ناوه‌ندی، مه‌سعود فه‌ریقی، رزگار عه‌باس زاده، خه‌لیل نادری، ئه‌رده‌لان خوسره‌وی، شیراز نادری، عه‌بدوڵڵا نه‌سیری، هه‌ڵۆ ڕه‌مشتی، فه‌ریبورز کرماشانی، ئەندامانی مەجلیسی گشتی و له‌یلا دیوبه‌ند، ئه‌ندامی کۆمیته‌ی پێوه‌ندییه‌کانی پارتی ئازادیی کوردستانه‌وه‌ به‌ گه‌رمی پێشوازی لێکرا .

   به‌ڕێز د. که‌مال که‌رکووکی سڵاو و هه‌واڵپرسیی رێزدار مه‌سعود بارزانی سه‌رۆکی هه‌رێمی کوردستان و سه‌رۆکی پارتی دیمۆکراتی کوردستان و مه‌کته‌بی سیاسی پارتی، پێشکه‌ش کرد، پاشان ئاماژه‌ی به‌و بنه‌مایانه‌ کرد که‌ پارتی دیمۆکراتی کوردستان و پارتی ئازادیی کوردستانی کردووه‌ته‌ دۆست و هاوپه‌یمانی ستراتیژی بۆ وه‌دیهاتنی ماف و ئامانجه‌کانی نه‌ته‌وه‌ی کورد. هه‌روه‌ها سڵاو و رێزی بۆ به‌ڕێز عه‌لی قازی محەمه‌د نارد که‌ له‌پێناو هه‌مان ئامانجه‌کانی پێشه‌وا قازی باوکیدا خه‌بات ده‌کا. به‌ڕێز د. که‌مال که‌رکووکی پێی له‌سه‌ر هه‌رچی زیاتر به‌هێزکردنی پێوه‌ندییه‌کانی هه‌ردوولا، له‌سه‌ر بنه‌مای ئامانج و ئه‌رکی هاوبه‌شی نه‌ته‌وه‌یی ئاشتیخوازانه،‌ له‌ عه‌ینی رێزگرتن له‌ سه‌ربه‌خۆیی بڕیاردانی لایه‌نی دۆست کرده‌وه‌ .

   حسین یه‌زدانپه‌نا، جێگری سه‌رۆکی پارتی ئازادیی کوردستان له‌لایه‌ن سه‌رۆک و سه‌رکردایه‌تی پارتی ئازادیی کوردستانه‌وه‌، به‌خێرهێنانی شاندی میوانی کرد و سوپاس و رێزی بۆ به‌ڕێز سه‌رۆک بارزانی و مه‌کته‌بی سیاسی پارتی دیموکراتی کورستان نارد و له‌لای خۆیه‌وه‌ ده‌وری گرینگ و مێژوویی بنه‌ماڵه‌ی تێکۆشه‌ری بارزانی و پارتی دیمۆکراتی کوردستانی له‌ خه‌باتی کوردایه‌تی دا ‌وه‌رد دایه‌وه‌. یه‌زدانپه‌نا، به‌ ئاماژه‌ به‌و خاڵه‌ وه‌ک یه‌ک و هاوبه‌شانه‌ی له‌ ئامانج و ستراتیژی پارتی ئازادیی کوردستان و پارتی دیمۆکراتی کوردستاندا هه‌یه‌، پێوه‌ندی و دۆستایه‌تی نێوانیانی به‌ فاکته‌ری به‌هێزبوونی بیر و ستراتیژ و گوتاری نه‌ته‌وه‌یی ئاشتیخوازانه‌ی کورد له‌ رۆژهه‌ڵاتی ناوه‌ڕاست دانا.

   گفتوگۆ و بیروڕا گۆڕینه‌وه‌ له‌سه‌ر بارودۆخی ناوچه‌که‌ و پڕۆسه‌ی ئاماده‌کاری کۆنگره‌ی نه‌ته‌وه‌یی کورد، له‌ ته‌وه‌ره‌کانی دیکه‌ی ئه‌م چاوپێکه‌وتنه‌ بوون. رێزدار که‌رکووکی وه‌دواخرانی به‌ستنی کۆنگره‌ی بۆ به‌ڕێوه‌چوونی هه‌ڵبژاردنی په‌رله‌مانیی هه‌رێمی کوردستان و بڕیاری کۆمیته‌ی ئاماده‌کار گه‌ڕانده‌وه‌ و ئه‌و ده‌نگۆیانه‌ی ره‌ت کرده‌وه‌ که‌ گوترابوون وه‌دواخستنی به‌ستنی کۆنگره‌ له‌سه‌ر داوای سه‌رۆکی هه‌رێمی کوردستان بووه‌. له‌ باسی کۆنگره‌ی نه‌ته‌وه‌ییدا، جیگری سه‌رۆکی PAK، ئاواتی خواست که‌ کۆنگره‌، له‌ کاتی دیاریکراودا بگیرێ و دووربێ له‌ گیانی پارچه‌گه‌رێتی و خۆسه‌پێنی و به‌ڕۆحی یه‌کبوون و یه‌کێتی نه‌ته‌وه‌یی، ستراتیژ و گوتاری کورد وه‌ک یه‌ک نه‌ته‌وه‌ له‌ رۆژهه‌ڵاتی ناوه‌ڕاستدا دیاریی بکا .

پارتی ئازادیی کوردستان

کۆمیته‌ی راگه‌یاندن

22 خەرمانانی 2713

13 سێپتامبری 2013