PAZADIK: بۆ تاوتوێکردنی ناوەرۆکی نامەیەکی سەرۆکایەتی پارتی ئازادیی کوردستان، لەسەر بانگهێشتی دەفتەری سیاسیی حیزبی دیموکراتی کوردستان، کۆبوونەوەیەک لە نێوان دوولایەندا پێکهات.

سەعات 11ی ئەمڕۆ شەممە 9ی سەرماوەزی 2713 رێکەوتی 2013/11/30 بەڕێز حسێن یەزدانپەنا جێگری سەرۆکی پارتی ئازادیی کوردستان بە یاوەری شاندێکی سەرکردایەتی PAK پێکهاتوو لە هەڤاڵان شەماڵ پیران، رزگار عەباسزادە، خەلیل نادری و ئەردەڵان خوسرەوی، سەردانی دەفتەری سیاسیی حیزبی دیموکراتی کوردستانی کرد و لە لایان شاندێکی حیزبی دیموکڕاتی کوردستان، بەڕێز خالید عەزیزی سکرتێری گشتی حیزبی دیموکراتی کوردستان پێشوازیی لێکرا.

 لە سەرەتای کۆبوونەوەکەدا کاک خالید عەزیزی وێڕای دەربڕینی خۆشحاڵیی لەو چاوپێکەوتنە، ناوەرۆکی نامەکەی سەرۆکایەتی پارتی ئازادیی کوردستانی بە هەنگاوێکی بەرپرسانە هەڵسەنگاند و دەرچوون لە پرش و بڵاوی هێزە سیاسییەکانی رۆژهەڵاتی کوردستانی بە پێویست دانا و ئامادەیی حیزبی دیموکراتی کوردستانی بۆ هەڵگرتنەوەی هەنگاوی عەمەلیی هاوبەش لەگەڵ پاڕتی ئازادیی کوردستان و حیزب و رێکخراوە سیاسییەکانی دیکەی رۆژهەڵاتی کوردستانی راگەیاند.

لە لای خۆیەوە جێگری سەرۆکی پارتی ئازادیی کوردستان بە ئاماژە بە ئاکامەکانی هەڵبژاردنی خولی یازدەهەمی سەرکۆماری ئێران و هاتنە سەرکاری حەسەن رووحانی و ئەو هەلوومەرج و کەش و هەوا سیاسییە تازەیەی هاتووەتە گۆڕێ، لەسەر چوارچێوە و ناوەرۆکی ئەو نامەیەی سەرۆکایەتی PAK پێشکەشی رێبەرایەتی هێزە سیاسییەکانی رۆژهەڵاتی کوردستانی کردووە، پێی داگرتەوە.

لەم پێوەندییەدا پاش تاوتوێکردنی زیاتری ئەو بابەتە، هەردوولا لەسەر ئەوە ساخ بوونەوە کە خولێکی نوێ لە حەول و تەقەلا بۆ لێکنزیکبوونەوە و گەیشتن بە چوارچێوەیەک بۆ کار و خەباتی هاوبەشی هێزەکانی رۆژهەڵاتی کوردستان، دەسپێبکرێ.

هەرلەم کۆبوونەوەیەدا کۆمەڵێک بابەتی جێی بایەخی هەردوولا و لەوانە رێککەوتنی گروپی 5+1 لە گەڵ کۆماری ئیسلامی لەسەر پرسی وزەی ئەتۆمیی، گۆڕانکارییە ناوچەییەکان و رووداوەکانی پێوەندیدار بە پرسی کوردیان خستەبەر باس و ئاڵووگۆڕی بیروڕا.

لەبڕگەی کۆتایی کۆبوونەوەکەدا هەردوولا لە سەر ئەوە کۆک بوون کە پێوەندییەکانیان بخەنەوە باری گەرم و گوڕی و لەسەر بنەمای تەبایی و رێزگرتنی دوولایەنە ، پەرە بە هاوکاریییەکانیان بدەن.

پارتی ئازادیی کوردستان

کۆمیتەی راگەیاندن

9 سەرماوەزی 2713

30 نۆڤامبری 2013