PAZADIK : سەعات 18:30 دەقیقەی رۆژی چوارشەممە 14 جۆزەردانی 2714 (4 ژوئەنی 2014)، حسەین یەزدانپەنا جێگری سەرۆکی پارتی ئازادیی کوردستان، سەردانی بیرمەند و دۆستی گەورەی کورد د. ئیسماعیل بێشکچی کرد.

   جێگری سەرۆکی PAK لەجیاتی سەرۆک و لە لایان هەموو تێکۆشەرانی ریزەکانی پارتی ئازادیی کوردستانەوە، هەروەها بەناوی سەرجەم رێبوارانی رێگای سەربەخۆیی کوردستان، رێز  و سوپاس و پێزانینی پێشکەشی ئەم دۆستە گەورەیەی کورد و پشتیوانی سەربەخۆیی و بەدەوڵەتبوونی کوردستانی کرد سەبارەت بە تێکۆشانی فیکریی لە مێژینەیەی لەسەر پرسی کورد و هەروەها هەڵوێستەکانی بەرانبەر دەوڵەتی داگیرکەری ئێران و رێژیمی کۆماری ئیسلامی.

   جێگری سەرۆکی PAK هەروەها، کورتەیەک لە هەلومەرجی رۆژهەڵاتی کوردستان و پووختەیەک لە بنەما فیکرییەکان و سیاسەت و ئامانجی پارتی ئازادیی کوردستانی، لەگەڵ نووسخەیەک لە "مانیفێستی ئازادیی کوردستان"، پێشکەشی د. بێشکچی کرد.

پاشان د. ئیسماعیل بێشکچی وێڕای دەربڕینی خۆشحاڵیی خۆی لە بینینی جێگری سەرۆکی PAK و شاندی هاوڕێی، پاڵپشتی خۆی لە سیاسەت و ئامانجەکانی پارتی ئازادیی کوردستان وەک ئاڵاهەڵگری سەربەخۆیی کوردستان، دەربڕی.

د. بێشکچی بە ئاماژە بە وتەکانی پێشەوا قازی محەمەد، پێی لەسەر ئەوە داگرتەوە کە کوردیش وەک فارس و عەرەب و ترک مافی خۆیەتی سەربەخۆ و خاوەن دەوڵەت بێ. مامۆستا بێشکچی رایگەیاند: شەرت کوردستانیی بوونە و پرسی کورد لە بەغدا و ئانکارا و تاران و دیمەشق و بە دیسکۆرسی دیمۆکراتیزەکردنی ئەو وڵاتانە، چارەسەر نابێ و پرسێکی رزگاریخوازیی نەتەوەییە.

د. بێشکچی بە ئاماژە بە تێرۆری د. عەبدولرەحمان قاسملوو سکرتێری گشتیی حیزبی دیمۆکرات، وتی: تێرۆری د. قاسملوو لەسەر مێزی وتووێژ بۆ ئۆتۆنۆمی کوردستان، نیشانی دا کە ئێران وەک دەوڵەتێکی داگیرکەر هیچ ئاست و جۆرێک لە مافەکانی کورد قبووڵ ناکات و رێگای ئازادیی کورد لە تاران و بەستراتیژیی دیمۆکراتیکردنی دەوڵەتی داگیرکەر تێناپەڕێ و کورد دەبێ بۆ سەربەخۆیی خۆی خەبات بکات.

لە پشتگیریی لە روانگەی بێشکچی، حسەین یەزدانپەنا، پێی لەسەر ئەوە داگرتەوە کە پارتی ئازادیی کوردستان، وەک حیزبی نەوەی نوێی کورد، حیزبی سەربەخۆیی و بەدەوڵەتکردنی کوردستانە و دڵۆپێ عارەقە و خوێن لە رێگای شتێ جگە لە سەربەخۆیی کوردستان، ناڕێژێ.

لە کۆتایی دیدارەکەدا، جێگری سەرۆکی PAK، مەدالیای پێشەوا قازی محەمەدی پێشکەشی دۆستی گەورەی کورد د. ئیسماعیل بێشکچی کرد.

پارتی ئازادیی کوردستان

کۆمیتەی راگەیاندن

15 جۆزەردانی 2714

5 ژوئەنی 2014