PAZADIK: سامان نەسیم، زیندانیی کوردی مەحکوم بە ئێعدام، بە بڵاوکردنەوەی نامەیەک لە زیندانی ناوەندیی ورمێ رایگەیاندووە کە دانپێدانانەکانی رابردووی دوای ئەشکەنجەکردنی بە گوتەی خۆی "نامرۆڤانە و نایاسایی"دا تۆمار کراون.

ناوبراو لەو نامەیەدا کە رۆژی 23 رێبەندان لە ماڵپەڕی کەمپەینی نێودەوڵەتیی مافی مرۆڤ لە ئێران بڵاوکراوەتەوە، هەڵواسین بە دەست و پێ، رێگریی لە خەوتن و هەڕەشەی مردنی وەک نموونەی ئەو ئەشکەنجانە خستووەتە ڕوو لە ماوەی 97 رۆژی زیندانیکردنیدا.

بەپێی هەواڵی چاودێرانی مافی مرۆڤ، سامان نەسیم لە تەمەنی 17 ساڵیدا قۆڵبەستکراوە و پاشان بەهۆی ئەندامەتیی لە پارتێکی بەرهەڵستکاری نیزام  و بەتۆمەتی دژایەتیکردنی خودا، حوکمی ئێعدامی بەسەردا سەپا.

سامان نەسیم لە نامەکەیدا نووسیویەتی: "لە تەواوی ئەو ماوەیەی کە لە زینداندا بووم، بەهەر شێوە و بە هەر ئامرازێک ئەشکەنجە دراوم. لە رۆژانی سەرەتادا ئاستی ئەشکەنجەکان بەرێژەیەک بوو کە توانای رێ رۆیشتنم نەبوو. هەموو ئەندامەکانی جەستەم رەش و شین ببووەوە. بۆ ماوەی چەندین سەعات بە دەست و پێ هەڵواسراوم."

نەسیم لەگەڵ ئاماژەکردن بە هەڕەشەی مەئمورین بە قۆڵبەستکردنی باوک، برا و دایکی، رایگەیاندووە: "بەمنیان دەگوت کە تۆیش هاوشێوەی هاوڕێیەکانت بە شۆفڵ دەخەینە ژێر گڵ. دەیانگوت هەر لێرەدا دەتکوژین و چیمەنتۆ دەکەینە سەر گۆڕەکەت."

ناوبراو هەروەها رایگەیاندووە: شەوانە کە دەمویست بخەوم بە نانەوەی دەنگەدەنگ بە شێوەی جۆراوجۆر رێگەیاند نەدەدا بخەوم. لە نێوان تێکچوون و هۆشیاریدا بووم. تەواوی ئەم 97 رۆژە بەم شێوەیە بووم."

لە لای خۆیەوە چاودێرانی مافی مرۆڤ ە رێکخراوی لێبوردنی نێودەوڵەتیی رۆژی سێشەممە 21 رێبەندان، هۆشدارییان دابوو لە ئەگەری لەسێدارەدانی سامان نەسیم لە کاتێکی نزیکدا و داوای راگرتنی ئەم هەنگاوەیان کردووە.