PAZADIK: لە دوایین رۆژی مانگی خاکەلێوەی ئەمساڵ 11 زیندانیی بە تۆمەتی بازرگانیی مادەی هۆشبەر ئێعدام کراون و 11 زیندانیی دیکەش لە چەند رۆژی داهاتوودا ئێعدام دەکرێن.

بەپێی هەواڵی هرانا، رۆژی یەکشەممە 31 خاکەلێوەی 2714، 11 زیندانیی بە تۆمەتی بازرگانیی مادەی هۆشبەر لە یەکەی 2 زیندانی قزڵ حەسار لەسێدارەدراون.

ئەمەش لەکاتێکدایە کە راگەیاندنە فەرمییەکانی ئێران و هێزی دادوەریی کەرەج لەمبارەیەوە بێدەنگییان کردووە.

جێگەی باسە کە یەکێک لەم زیندانیانە بەناوی رەسوڵ تالبی کە بەر لە ئێعدامکرانی داوای چاوپێکەوتنی لەگەڵ خێزانە نەخۆشەکەی کردبوو، بەڵام ئەم داوایە لە لایان بەرپرسانی زیندانەوە رەتکرابووەوە و بەر لە ئێعدامکردنی بەرەنگاریی کردبوو و بەم هۆیەوە رووبەرووی لێدان و ئەشکەنجە ببووەوە.

هەروەها رۆژی پێنجشەممە 18 گوڵان، 14 زیندانیی لە یەکەی 2 زیندانی قزڵ حەساری کەرەج بۆ ژووری تاکەکەسی گوێزراونەتەوە بۆ ئەوەی حوکمی ئێعدامی 11 کەس لەوانە جێبەجێبکرێ.

فەخرەدین بەشارەتی و عەلی قوبادی ناوی دوو کەس لەو زیندانیانەیە کە بۆ جێبەجێکردنی حوکمەکانیان بۆ ژووری تاکەکەسیی راگوێزراون.