دوو زیندانیی کوردی ئەهلی سوننەت بە ئێعدام مەحکومکرانەوە
21/5/2014
PAZADIK: دوو زیندانیی
کوردی ئەهلی سوننەت کە پێشتر حوکمی ئێعدامیان لە دیوانی باڵای ئێران هەڵوەشێندرابوو،
بەبێ دادگاییەکی نوێ حوکمی ئێعدامیان بەسەردا سەپایەوە و حوکمی یەکلایی بۆ
جێبەجێکردنی حوکمەکان رەوانە کراوە.
بەپێی هەواڵی چاوێرانی مافی مرۆڤی کوردستان،
رۆژی 7 بەفرانباری ساڵی رابردوو، سەیدهادی حوسێنی و سەدیق محەمەدی لە رێگەی
پارێزەرەکانیانەوە هەواڵی ئەوەیان پێگەیشت کە حوکمی ئێعدامەکانیان لە لایان دیوانی
باڵای ئێرانەوە رەتکراوەتەوە و فایلەکانیان جارێکی دیکە دەبێ لە دادگای شۆڕشی سنە
بەدواداچوونیان بۆ بکرێ. بەڵام ئەم دوو زیندانییە کوردە بەبێ ئەوەی جارێکی دیکە
دادگایی بکرێنەوە، حوکمی ئێعدامیان بەسەردا سەپێنراوەتەوە.
رۆژی دووشەممە فاتمە مورشید پارێزەری سەیدهادی
حوسێنی و حەمید ساعدیی مووچش پارێزەری سەدیق محەمەدی رایانگەیاند کە حوکمی ئێعدامی
ئەم زیندانییە کوردە یەکلایی بووەتەوە و رەوانەی بەشی جێبەجێکردنی حوکمەکان کراوە.
هەروەها رایانگەیاند کە مەترسیی لەسێدارەدانیان لەسەرە.
|