PAZADIK: دەوڵەتی ئەمریکا رۆژی دووشەممە 12 جۆزەردان و رۆژێک دوای ئێعدامی زیندانییەکی سیاسیی لە ئێران، نیگەرانیی خۆی سەبارەت بە ئاماری بەرزی ئێعدامەکان لە ئێران دەربڕی.

جۆن ساکی، وتەبێژی وەزارەتی دەرەوەی ئەمریکا، رایگەیاند کە ویلایەتە یەکگرتووەکان سەرەڕای ئەوەی بەشوێن رێگەچارەیەکی دیپلۆماسییەوە لەمەڕ بەرنامەی ناوکیی ئێران، بەڵام لە هەمانکاتدا نیگەرانی پێشێلکردنی مافی مرۆڤ لەو وڵاتەیە و پشتیوانیی لە هەموو حەولەکان بۆ هێنانە کایەی ئازادییە سەرەتاییەکان لە ئێران دەکا.

ساکیی گوتوویەتی: رەچاوکردنی مافی مرۆڤ لە لایان دەوڵەتی ئێران، ئەزموونێکی کلیلییە بۆ پەیوەستبوونی ئەو وڵاتە بە کۆمەڵگای جیهانییەوە.

 غوڵامرەزا خوسرەوی، زیندانیی سیاسیی کە لە ساڵی 1386 ەوە لە زینداندا بوو، رۆژی 11 جۆزەردان، بەتۆمەتی دژایەتیکردنی خوا لە رێگەی هەنگاوی کاریگەر بۆ بەرەوپێشبردنی ئامانجەکانی موجاهیدینی خەڵک لە زیندانی رەجایی شاری کەرەج لەسێدارە درا.