دوو عەرەبی ئەهواز بە نهێنێ ئێعدام کراون
14/6/2014
PAZADIK: بەپێی راپۆرتی سەرچاوەکانی هەواڵ، دوو
هاووڵاتیی عەرەبی ئەهواز بەناوەکانی عەلی چبیشات و خالید مووسەوی، بەشێوەیەکی
نهێنی لەسێدارە دراون.
کەریم دەحیمی، چالاکی مافی مرۆڤی ئەهواز بە کەمپەینی نێودەوڵەتی مافی
مرۆڤ لە ئێرانی گوتووە کە مەئمورینی ئیتلاعاتی ئەهواز رۆژی 22 جۆزەردان لە
پێوەندییەکدا لەگەڵ بنەماڵەی عەلی چبیشات، هەواڵی ئێعدامی ئەم زیندانییە عەرەبەیان
پێ راگەیاندوون و هۆشدارییان داوە کە بۆیان نییە پرسەی بۆ دانێن.
بەگوتەی ئەم چالاکە عەرەبە، مەئمورینی ئیتلاعاتی ئەهواز گوتوویانە کە
بۆ راگەیاندنی ئێعدامی خالید مووسەوی، پێوەندیی بە بنەماڵەکەیانەوە دەکەن.
شایانی باسە کە خالید مووسەوی و عەلی چبیشات کە تۆمەتبارکرابوون بە
تەقاندنەوەی لوولەی گازی سرووشتیی لە نزیکی شوێنی نیشتەجێبوونیان، لە خەزەڵوەری
1391 لە شاری شووش قۆڵبەست و دواتر حوکمی ئێعدامیان بەسەردا سەپا.
|