PAZADIK: راگەیاندنەکانی ئێران رۆژی یەکشەممە هەواڵی مەحکومکرانی هەشت چالاکی تۆڕی کۆمەڵایەتی فەیسبووک لەلایان دادگای شۆڕشی ئیسلامی بە 127 ساڵ زیندانیان بڵاوکردەوە.

بەپێی راپۆرتەکان، لقی 28 دادگای شۆڕش هەشت لاوی چالاک لە تۆڕی کۆمەڵایتی فەیسبووکیان بە تۆمەتگەلی وەک کۆبوونەوە و حەولدان دژی ئاسایشی نەتەوەیی، چالاکیی پڕوپاگەندە دژی نیزام، بێحورمەتی بە پیرۆزییەکان، بێحورمەتیی بە سەرانی قوا و بێحورمەتیی بە کەسەکان، بە گشتیی بە نزیکەی 127 ساڵ زیندان مەحکومکرد.

ئەم کەسانە چەند پەیجێکیان لە فەیسبووک بەڕێوەبردووە کە لە مانگی پووشپەڕی ساڵی رابردوو رووبەردووی بەدوواداچوونی قەرارگای ساروڵڵا یەکێک لە قەرارگا ئەمنییەکانی سوپای پاسداران بوونەوە و دوای ئەویش بە حوکمی دادوەر، قۆڵبەست و رەوانەی زیندانکران.

بەناو تۆمەتبارانی ئەم فایلە لە شارە جیاوازەکانی وەک یەزد، شیراز، ئابادان، کرمان و تارانن کە فایلەکەیان نزیکەی 11 بەرگ دەبێ.

دوو کەس لەم چالاکانە بەریز بە 18 ساڵ و 19 ساڵ زیندان، دانی ملوێنێک و 300 هەزار تمەن سزای نەخدی و 50 قامچیی حوکمدراون.

ئەوانی دیکەش هەریەکە بە 21، 14، 20، 11 و 16 ساڵ زیندان حوکمدراون.

فایلەکەشیان لە ئێستادا رەوانەی دادگای پێداچوونەوە کراوە بەڵام تا ئێستا پێداچوونەوەیان پێدا نەکردووە.

شایانی باسە کە لە راگەیاندنەکانی ئێران، هیچ ئاماژەیەک بەناوی ئەم کەسانە نەکراوە.