حوسێن یەزدانپەنا: دەبێت پشگیری لە سەرۆك بارزانی بكەین تا ئەو دەستانە بشكێنێت كە كوردستان پارچە پارچە دەكات
18/4/2015
pazadik:
هەولێر-KDP.info- جێگری سەرۆكی پارتیی ئازادیی كوردستان (حوسێن یەزدانپەنا) دەڵێت، قسەكانی ئەندامی كۆما جڤاكێن كوردستان (دۆران كاڵكان)، جگە لەوەی دەستوەردانە لە كاروباری باشوور، لەم دۆخەدا كوردستان پارچە پارچە دەكات.
''ئەوەی لە باشووری كوردستان هەیە لە ئازادییش تێپەڕیوە و، بۆ كەسێكی وەك (كاڵكان) نییە حوكمی دیكتاتۆری بەسەردا بدات''
جێگری سەرۆكی پارتیی ئازادیی كوردستان (حوسێن یەزدانپەنا) بۆ ماڵپەری فەرمیی پارتیی دیموكراتی كوردستان گوتی: "بە داخەوە جارێكی دیكە لەناو سەركردایەتیی كەجەكەدا لێدوانی لەو جۆرە دەدرێت كە هەموومان داوای یەكدەنگی و یەكهەڵوێستی دەكەین، بەڵام ئەم لێدوانانەی (دۆران كاڵكان) خزمەت بە هیچ لایەنێك ناكات، لە كاتێكدا ئەم ئەزموونەی كوردستان نەك وەك ئەوەی (كاڵكان) باسی دەكات دیكتاتۆری نییە، بەڵكە بووەتە ناوەندێكی سیاسی و دیموكراتی لە ڕۆژهەڵاتی ناوەڕاستدا، لە كاتێكدا خودی دیموكراتی بێ گرفت نییە، بەڵام سیستەمی دیموكراتی لە سیستەمەكانی دیكە باشترە، بۆیە لە ڕۆژهەڵاتی ناوەڕاستدا كام نموونەمان هەیە دیموكراتیانە هەڵبژاردن بكات بۆ سیستەمی بەڕێوەبردن، بۆیە ئەوەی لە باشووری كوردستان هەیە لە ئازادییش تێپەڕیوە و بۆ كەسێكی وەك (كاڵكان) نییە حوكمی دیكتاتۆری بەسەردا بدات".
جێگری سەرۆكی پارتیی ئازادیی كوردستان ئاماژەیشی دا: "بەداخەوەم كە ئەم جۆرە قسانە لەلایەن پێكهاتەیەكی سیاسیی كوردستانەوە دەكرێن، كە جیاكاری لە نێوان بادینی و سۆرانیدا بكات، لە كاتێكدا وڵاتێكی وەك ئەڵمانیا كە باكوور و باشووری هەیە دوو زارەوەی زۆر جیاوازی هەن بە بەراورد لەگەڵ بادینی و سۆرانیدا، كەچی پێكەوە وەڵات بەڕێوە دەبەن، بۆیە جیاكاری لە نێوان زماندا زۆر ترسناكە".
''پارتی لەنگەری ئەم دۆخەی كوردستانی پاراستووە و ئازادیی بەرهەم هێناوە''
(یەزدانپەنا) كه كه‌سایه‌تیی سیاسیی دیاری ڕۆژهه‌ڵاتی كوردستانه گوتیشی: "پارتیی دیموكراتی كوردستان نەك هەر حزبێكی سیاسیی كوردستانە، بەڵكە دامەزراوەی نەتەوەییە و 70 ساڵە بە خەبات و بەرخۆدان و كوردایەتییەوە سەرقاڵە و قوتابخانەی (بارزانی نەمر)ـە، هەڵكەوتەی سەركردەیەكی شۆڕشگێڕە كە چەقی لە كۆمەڵگادا داكوتاوە، پارتی لەنگەری ئەم دۆخەی كوردستانی پاراستووە و ئازادیی بەرهەم هێناوە، بۆیە قسەكانی (كاڵكان) دەستوەردانە لە كاروباری باشووری كوردستان".
(حوسێن یەزدانپەنا) داوایش لە سەركردایەتیی پەكەكە دەكات واز لەو جۆرە لێدوانانە بێنن كە زۆر خراپن و كوردستان دەخەنە مەترسییەوە، چونكە هەڵوەشاندنەوەی ئەزموونی كوردستان، ئەجێندای دەوڵەتانی دوژمنە".
''كاڵكان، برینی پارچەپارچەكردنی كوردستانی كولاندینەوە''
جێگری سەرۆكی پارتیی ئازادیی كوردستان دەشڵێت: "هەموو لایەكمان پێویستمان بە ناوەندی بەهێز هەیە، بۆ ئەمەیش دەبێت پشگیری لە (سەرۆك بارزانی) بكەین تا ئەو دەستانە بشكێنێت كە كوردستان پارچە پارچە دەكات".
|