وشە/ هەولێر- هیدایەت جان

دوای ئەوەی پارتی ئازادی كوردستان لە رێگەی "وشە" ئاشكرای كرد، تۆڕێكی سیخوڕیی ئیتڵاعاتیان لە هەولێر گرتووە كە هەوڵیان بۆ لێكترازانی هێزی پێشمەرگەی ئەو پارتە داوە لە بەرەكانی شەڕی دژ بە داعش، حوسێن یەزدانپەنا، لەو چاوپێكەوتنەدا بۆ "وشە" ئاشكرای دەكات كە ئیتڵاعات وەك تۆڵە ستاندنەوە لە پارتەكەیان، لە ئیلام و مهاباد زیاد لە ١٥ لایەنگر و ئەندامی لێ گرتوون و تاوانی تیرۆریستی خستوونەتە پاڵ. هاوكات یەزدانپەنا ئاشكرای دەكات كە هیچ هێزێكی پێشمەرگەیان لە سنوورەكان جێگیر نەكردووە و ئەوەی لە تۆڕە كۆمەڵایەتییەكان باس كراوە لەسەر ناردنەوەی هێز بۆ سنوورەكان و ناوخۆی رۆژهەڵات، بە هەواڵی ناڕاستیان دەزانێت.

* دوو هەفتە لەمەوبەر "وشە" هەواڵێكی بڵاو كردەوە كە تۆڕێكی سیخوڕیی كۆماری ئیسلامیتان گرتووە كە كاری لەسەر دابڕانی پێشمەرگەكانی پاك كردووە، ئەوان دانیان بە كارەكانیان ناوە؟
- ئەو گرووپە سیخوڕییە لە دەرەوەی پارتی ئازادی و لە هەرێمی كوردستان، دژی پارتی ئازادی كاریان دەكرد، ئەو گرووپە نێزیكەی ٦ مانگ بوو دەستیان كردبوو بە كارەكانیان، رێك لەو كاتەدا دەوری "پاك" لە بەرەكانی شەڕی دژ بە داعش دەردەكەوت و ژمارەی هێزەكانمان لە زیادبووندا بوو. لەو حاڵەتەدا كتوپڕ رووبەڕووی جووڵەیەك بووینەوە كە لە دەرەوەی پارتی ئازادی كوردستانەوە ئەنجام دەدرا بۆ تێكدانی ئەو هێزە و دابڕاندنی پێشمەرگە بەشێوەی جۆراوجۆری شەڕی سایكۆلۆجی. لەناوخۆی رۆژهەڵات ئیتڵاعات پاڵەپەستۆی خستبووە سەر بنەماڵەی پێشمەرگەكانمان و تەماحی دەخستنە بەر بۆ دابڕاندنی رۆڵەكانیان لە پاك، هەر لە رێگەی بنەماڵەكانیانەوە، ژمارە تەلەفۆنی پێشمەرگەكانیان وەردەگرت و راستەوخۆ پێوەندییان پێوە دەكردن و هەم بە زمانی هەڕەشە و هەمیش بە زمانی بەڵێن هەوڵیان لەگەڵ دەدان. ئامانجیان هەبوو ئەو هێزەی ئێمە كە دەور و كاریگەری لە بەرەكانی شەڕدا هەبوو، لەبەریەك هەڵی وەشێنن، هاوكات ئەو تۆڕە سیخوڕییە لە باشوور بەو ئاراستەیەدا دەستی كردبوو بە كارەكانی.

* ئەو تۆڕە سیخوڕییەی ئیتڵاعات توانییان هیچ زیانێك بە هێزەكانی ئێوە بگەیەنن؟
- نایشارینەوە كە زیان و خەساری بە هێزەكانمان گەیاند، لایەكەوە ژیان و بارودۆخی هێزەكانمان لەو شەڕەدا لەبار نەبوو، ئەوەش وای كرد ئەو پاڵەپەستۆیانە زیان بە هێزەكانی ئێمە بگەیەنێت، نەك بەو مانایەی لاوازمان بكات، بەڵكو بەو مانایە كە یەك پێشمەرگە لە ئێمە داببڕێت خەسارە و یەك پێشمەرگەی كورد لە خەبات بۆ ئازادی و پاراستنی كوردستان داببڕێنن بەلای ئێمەوە خەسارە.

* پلانی گرتنی ئەو تۆڕە لەلایەن "پاك"ەوە چۆن بوو؟
- دوای ئەوەی ئێمە جموجۆڵی ئەو تۆڕە كە هەستمان پێ كردبوو، خستمانە بەر وردبینییەوە، توانیمان ئەو تۆڕە ئاشكرا بكەین و كەسەكانی بناسین. دواتر لە پلانێكدا توانیمان یەكێك لە كەسە هەرە چالاكەكانی ئەو تۆڕە بگرین، ئەو تۆڕە هەموویان كوردی رۆژهەڵاتن، بەڵام چەند كەسێكی باشووری كوردستان هاوكاریان بوون و ئاسانكارییان بۆ كردبوون لە هاتوچۆكردن و دابینكردنی شوێنی حەوانەوەیان. ئەو كەسەی لەلایەن هێزەكانی ئێمەوە گیرا، هەم لە رۆژهەڵات و هەم لە باشووری كوردستان پێشتریش كاری بۆ ئیتڵاعات كردبوو، لە كاتێكدا گیرا كە دەیویست پێشمەرگە دابڕاوەكانی ئێمە بگوازێتەوە و رەوانەی ئێرانیان بكاتەوە. دوای گیرانەكەی، ئەندامەكانی تری تۆڕەكەی ئاشكرا كرد و دانی پێدا نا كە مانگانە مووچەیان لەلایەن وەزارەتی ئیتڵاعاتەوە لە رێگەی نووسینگەی حەواڵەكانەوە بۆ دەنێردرێت و دانی بەوەدا نا كە لەگەڵ كامە پێشمەرگەی پارتی پێوەندییان كردووە و بە چ شێوە و میتۆدێك قسەیان لەگەڵ پێشمەرگەكانمان كردووە. ئەوان بەڵێنی ناردنی ئەو پێشمەرگانەیان بۆ ئەوروپا داوە و چەند بەڵێنێكی تریان پێ داون.

* چارەنووسی ئەو تۆڕە چیی لێ هاتەوە كە لەلایەن ئێوەوە گیرابوون، ئایا تا ئێستەیش هەر لەلای ئێوە گیراون؟
- دوای ئەوەی ئەو تۆڕە دانیان بە كردەوەكانیان دانا، سەرۆكی تۆڕە سیخوڕییەكە لە بەردەم كامێرا دانی بە هەموو كردەوەكانیان دژ بە ئێمە دانا و پاش تۆماركردنی ئەو گرتە ڤیدیۆییە وەك بەڵگە، ئەوانمان رادەستی ئاسایشی هەرێمی كوردستان كرد.

* دوای بڵاوبوونەوەی ئەو هەواڵە لەلایەن پارتەكەتانەوە، كاردانەوەی كۆماری ئیسلامیی ئێران چی بووە، هەندێك سەرچاوەی ناڕەسمی كۆماری ئیسلامی باس لە گرتنی ئەندامانی ئێوە لە ناوخۆدا دەكەن؟
- دوابەدوای ئاشكرابوونی ئەو تۆڕە سیخوڕییە، دوای ئەوەی نەیانتوانی زیانێكی ئەوتۆ بە هێزەكانی ئێمە بگەیەنن و شكستخواردوو بوون، لە ناوخۆی رۆژهەڵات دەستیان كرد بە گرتنی هەر كەسێك كە گومانی پشتیوانی یان لایەنگری ئێمەی لێ دەكرا، لە ئیلام بە دەیان كەسیان بە تاوانی لایەنگری و هەوڵدان بۆ پەیوەستبوون بە "پاك"ەوە گرت و هەندێك لەوانەیان ئازاد كردوون، دەبێ بەیانی و ئێوارانە بڕۆنە ئیدارەی ئیتڵاعات بۆ ئەوەی بیسەلمێنن كە هەر لەناو شاردا ماونەتەوە و هەموو رۆژێك واژۆی خۆیان تۆمار بكەن، بەشێوەی دیاریكراو ٧ كەس لایەنگریی خۆیان لە پارتی ئازادی كوردستان نەشاردووەتەوە و ئێستە لەناو گرتووخانە گیراون.

هاوكات لە مهاباد ٨ بۆ ١٠ كەسیان گرتووە كە دوای گرتنی ئەو كەسانە، وەزارەتی ئیتڵاعات بەیاننامەیەكی دەركردووە و تیایدا دەڵێ، گرووپێكی تیرۆریستی سەر بە حزبێكی سیاسی كە لە هەرێمی كوردستاندا نیشتەجێیە، بە چەكەوە گیراون كە ویستوویانە چالاكی بكەن بۆ تێكدانی ئاسایشی دەوڵەت. ئەوە لە راستیدا دژكردەوەیەك بوو بەرامبەر ئاشكرابوونی ئەو گرووپە سیخوڕییەی خۆیان. ئێمە نیگەرانین و بیروڕای گشتی و لایەنە سیاسییەكان و رێكخراوەكانی مافی مرۆڤ و راگەیەندكاران ئاگادار دەكەینەوە كە وەزارەتی ئیتڵاعات، پلانێكی تری بەدەستەوەیە بۆ لەسێدارەدانی ژمارەیەكی تر لە رۆڵەكانی كورد لەناو گرتووخانەكانیدا، بۆیە بە بەیاننامەی فەرمی تاوانی تیرۆر و بەچەكەوە كاركردنی داوەتە پاڵ ئەو ژمارەیە لە گیراوانی كورد كە لایەنگری یان ئەندامەتیی خۆیان لە پارتی ئازادی كوردستان نەشاردووەتەوە. بۆیە ئێمە لەو حاڵەتە نیگەرانین.

* لە تۆڕە كۆمەڵایەتییەكان هەواڵی ئەوە بڵاو بووەتەوە كە ئێوە بە هێزی پێشمەرگەوە بەرەو سنوورەكانی رۆژهەڵات چوونەتەوە و دانیشتنتان لەگەڵ سەركردایەتیی پەكەكە هەبووە، ئایا ئێوەیش هێزتان بەرەو سنوورەكان جووڵاندووە؟
- ئێمە لەو ماوەیەدا هیچ سەردانێكی قەندیلمان نەكردووە، بەڵام لەلایەن كەجەكەوە شاندێكیان بۆ باسكردن لە رووداوی كێلەشین سەردانی ئێمەیان كردووە، پێوەندی ئێمە ئاساییە و دیارە قسە و هەڵوێستی خۆشمان هەبووە لەسەر رووداوەكەی كێلەشین، هەموو جۆرە هێرش و دەستدرێژی و شەڕی براكوژیمان مەحكووم كردووە و بە كارێكی نەشیاومان زانیوە، بۆ ناردنەوەی هێزیش بۆ رۆژهەڵاتی كوردستان، ئەوە مافی ئێمە و هەموو هێزێكی پێشمەرگەی رۆژهەڵاتی كوردستانە كەی بەپێویستی زانی خەباتی چەكداری گەرموگوڕ بكاتەوە، ئێمە ئەو خەباتەمان رەت نەكردووەتەوە، بەڵكو بە راشكاوی بڵێم، لەبەر بەرژەوەندی هەرێمی كوردستان رامان گرتووە، بەڵام هەر كاتێك ئێمە هەست بكەین ئەو بەرژەوەندییە نەماوە و هەرێمی كوردستان كەوتووەتە هەلومەرجێكەوە كە پێویست بەوە ناكات ئێمە رەچاوی ئەو بەرژەوەندییە بكەین، هەموو ئامادەییەكمان هەیە بۆ هەڵگیرسانەوەی خەباتێكی چەكداری گەرموگوڕ، بەڵام لە ئێستەدا هیچ هێزێكمان لە ناوچە سنوورییەكاندا جێگیر نەكردووە، بەڵام بە وردی چاودێریی بارودۆخەكە دەكەین.

* هەركات باس لە پژاك دەكرێ، زۆربەی هێزەكانی رۆژهەڵات بە باڵی پەكەكە ناوی دەبەن و وەك پارتێكی رۆژهەڵاتی كوردستان نایناسن، هەڵوێستی "پاك" لەبارەی پژاك چۆنە؟
- ئێمە لەگەڵ راستییەكانی ئێستەدا هەڵسوكەوت دەكەین، پژاك هێزێكی سیاسییە، لەگەڵ كێ نزیكە و فەرمان لە كێ وەردەگرێت و لەگەڵ چ لایەنێك تێكەڵاوی سیاسی و تەنزیماتی هەیە، ئەوە پێوەندی بەخۆیانەوە هەیە، ئەوەی بۆ ئێمە گرنگە ئەوەیە، رەفتاری سیاسیی پژاك چۆنە، نەك ئەوەی كە سەر بە چ لایەنێك بێت یان پێوەندی لەگەڵ چ هێزێك هەیە. ئێمە رەچاوی ئەوە دەكەین، بەڵام لە هەمان كاتدا كۆمەڵێك رەفتاری سیاسیی پژاكمان پێ دروست نییە، یەك لەو رەفتارە نادروستانە دەركردنی ئەو بەیاننامەیە بوو كە لە جێگەی خۆیدا نەبوو و هەلومەرجی كوردستان هەڕەشە لە یەكتر هەڵناگرێ و كارێكی نادروستە.

* لەكاتێكدا كە دوو هێزی سیاسیی لە دانوستاندان بۆ چارەسەری كێشە و ناكۆكییەكانی نێوانیان، بە بڕوای ئێوە بۆ پژاك بەیاننامەیەكی هەڕەشە ئامێز دەكات و هاوسەرۆكەكەی لە تەلەڤزیۆن هێرش دەكاتە سەر دیموكراتەكان، ئایا ئەوە زیان بە بەرژەوەندیی سیاسیی رۆژهەڵات ناگەیەنێت؟
- ئەو بەیاننامە توندە لەجێی خۆیدا نەبوو و ئێمە رەخنەمان لەو راوێژە توندە هەیە. پژاك یان هەر هێزێكی سیاسیی تر، مافی خۆیەتی خەباتی سیاسیی خۆی بكات و رەخنەی سیاسی و ئایدیۆلۆژی لە هێزەكانی تر بگرێت، بەڵام زمانی هەڕەشە و توندوتیژ، نەك خزمەتی بەرژەوەندییەكانی كورد ناكات، بەڵكو ناچێتە خزمەتی ئەو لایەنەشەوە كە هەڵسوكەوتی پێ كردووە و بەپێچەوانەوە زیان بە دۆخی بزووتنەوەی كورد لە رۆژهەڵاتی كوردستان دەگەیەنێت. ئەوەی دەبوو پژاك بیكات، ئەوەبوو كە لەو هەلومەرجەدا دەوری خۆی بە هێوركردنەوەی ئەو ئاڵۆزییە گێڕابایە و یارمەتیدەر بوایە بۆ رەوانەوەی گومان و دوودڵی و مەترسییەكان، نەك ئەوەی خۆی بداتە پاڵ زمانی هەڕەشە، ئەویش لەكاتێكدا كە دوو لایەنی كێشەكە بەیەكەوە دانیشتوون و بەو ئەنجامە گەیشتوون كە دژایەتی یەكتر نەكەن