گەنجانی ڕۆژهەڵات بۆ پێشمەرگایەتی ڕوو لە باشوور دەكەن
8/7/2015
pazadik:
خەڵك – سەردار قادر
گەنجانی ڕۆژهەڵاتی كوردستان روو لە باشووری كوردستان دەكەن، بۆ ئەوەی بەشداری بكەن لە ڕیزەكانی هێزی پێشمەرگەی كوردستان.
حسێن یەزدان پەنا ؛جێگری سەرۆكی پارتی ئازادی كوردستان؛ بە (خەڵك)ی ڕاگەیاند: "خەڵكێكی زۆری ڕۆژهەڵات بە ڕێگای جیا جیا خۆیان دەگەیەننە ڕێزەكانی پێشمەرگەی حزبە ڕۆژهەڵاتییەكان، بۆیە لە دەروازە سنورییەكانەوە كۆماری ئیسلامی گرفت بۆ ئەو كەسانە دروست دەكات، كە دەیانەوێت بێنە ڕیزی پێشمەرگەوە، بەڵام تا ئێستا نەیتوانیوە بەتەواوی پێش بە هاتنی گەنجان بگرێت".
روونیشی كردەوە، تا ئێستاش، تەنها لە شاری ئیلام 700 گەنج لە ترمیناڵی ئیلام و كرماشان و سنە گیراون، لەگەڵ ئەوەشدا بەدەیان پێشمەرگە گەیشتونەتە ڕیزی پێشمەرگە.
وتیشی: "پێویستە هەر كەسێك لە توانایدایە، چەك هەڵبگرێ، با ئەو ئەركە بەجێ بگەیەنێت و ئیرادەی خۆی بە هێز بكات و چەكی بەرگری لە كورد لە شان بكات".
لە بارەی بەشداری كردنی ئەوان لە شەڕی داعش-دا، یەزدان پەنا ئاماژەی بەوە كرد، لە ماوەی ئەو 11 مانگەدا، كە لە سەنگەرەكانی پێشەوەی جەنگین لە ڕۆژئاوای كەركوك، پارتی (پاك) تا ئێستا 4 شەهید و 15 برینداری هەبووە.
وتیشی: "ئێمە 600 پێشمەرگەین لە شەڕی داعش بەشدارین و لە سەنگەرەكانی كەركوك و باشیكین بە جۆرێك 250 پێشمەرگە لە كەركوك و 200 پێشمەرگەش لە باشیك و 150 پێشمەرگەش لە پشوودایە، بەڵام لەكاتی پێویست ئەو پێشمەرگانەش بەشداری شەڕ دەكەن".
http://www.xelk.org/drejas.aspx?=hewal&jmare=24541&Jor=1
|