PAZADIK: رزگار عەباس زادە، ئەندامی مەجلیسی گشتی پارتی ئازادیی کوردستان، لە دیمانەیەکی هەفتەنامەی زاری کرمانجیدا تیشک دەخاتە سەر باروودۆخی ئێستای ناوچەکە و ئەو گۆڕانکارییانەی چاوەڕوان دەکرێت بێنە ئاراوە، هەروەها باس لە پاراستنی ئەزموونی کوردستان لە باشوور دەکات و پێیوایە هەموو لایەنە سیاسییەکانی کوردستان لەهەر پارچەیەکەوە بن پێویستە ئەو ئەزموونەی ئێستای باشوور بپارێزن.

زاری کرمانجی: پێت باشە هێزی پێشمەرگە بۆ هەمیشە لەو شوێنە بمێنێتەوە كە ئەم چەند رۆژە لێی جێگر كراوە؟

کورد و سەرکردایەتی سیاسی لە باشووری کوردستان دەبوا لە پاش لەناوچوونی دەسەڵاتی بەعسی سەدام حسێن لە ساڵی ٢٠٠٣ هەموو خاکی کوردستانی بخستبایەوە ژێر دەسەڵات و ئیدارەی خۆی بەڵام کیشە ناوخۆییەکان ئەو هەلەی لە کیس دا. مێژووی دەوڵەتان و بە تایبەتی کورد ئەوەی سەلماندووە کە کاتێک مافی کورد کەوتە مادە و تەبسەرەوە هیچ کات چارەسەر نابێ و ئەو سیاسەتە نەرمەبڕە تەنیا بیانوویەکن بۆ ئەوەی کوردی پێ بخڵافێنن. ئێستاکە لە پاش هێرشی کتووپڕی گروپی چەکداریی دەوڵەتی عیراق و شام بۆ سەر ناوچە سونی نشینەکانی دەرەوەی هەرێمی کوردستان هەلێکی زێرینی بۆ کورد رەخساندووە کە هەموو باشووری کوردستان بخاتە ژێر دەسەڵاتی خۆی و ئیدارەی حکومەتی هەرێمی کوردستان. پێویستە هێزی پێشمەرگە بێگەڕانەوە، بۆ هەمیشە لە سنوورەکانی کوردستان دابمەزرێ و سیاسەتی بەرگریی لە سنوور و خاک و خەڵکی کوردستان بەرانبەر هەر هێز و هێرشێک بگرێتەبەر.

زاری کرمانجی: ئایا لە رووی سیاسییەوە بە تایبەتی لە ئاستی وەڵاتی هەرێمی ئەو رێگە بە كورد دەدرێت تا هەمێشە لەو شوێنانە جێگر بكرن؟

وەک کورد گوتەنی ماڵ لە سێحەب ماڵ حەرامە؟ ناوچەکانی دەرەوەی ئیدارەی حکوومەتی هەرێم خاک و نیشتیمانی کوردن، نەگەڕاندنەوەی ئەو ناوچانە هەڵەی دەسەڵاتی سیاسیی باشووری کوردستان بووە. لە پاش رووخانی دەسەڵاتی سەدام حسێن کەیسی ئەو ناوچانە خرانە ناو فایلێک و پێشکەشی ناو دۆڵابی حکوومەتی بەغدا کرا. گەڕاندندەوەیان بۆ ژێر دەسەڵاتی حکوومەتی هەرێم کەوتە ناو پرۆسەی گفتگۆ و خرایە مادەی ١٤٠ و لێژنە و گفتگۆ، کە تا ئێستاکە بە هیچ ئاکامێک نەگەیشتووە و ناگات. دەرفەتێکی زێڕین بۆ کورد هاوشێوەی ١٩٩١ رەخساوە. لەمپەری هەرە سەرەکی بۆ راگەیاندنی دەوڵەتی سەربەخۆی کوردی ئەو ناوچانەن وا لە ژێر دەسەڵاتی سەرکردایەتی کورد و حکوومەتی هەرێمی کوردستان نین.

کورد لە عیراقدا خاوەن هێز و چەک و پێشمەرگەیە و بەرنگار بوونەوە لەگەڵ ئەو هێزە لە قازانجی هیچ لایەنێکدا نییە و دەورو و پێگەی کورد لە چاو ساڵانی رابردوو زۆر جیاوازترە. ئەگەڕ ئێمەی کورد چاوەڕوانی رێگەپێدانی وڵاتانی هەرێمی بین، نییەت و سیاسەتی ئەوان ئەوە دەخوازێ کە، هەولێریشیان بۆ چۆڵ بکەن و بگەڕێینەوە دۆخی ساڵانی داگیرکراویدا.

هێزی پێشمەرگەی کوردستان لە ژێر فەرماندەیی حکوومەتی هەرێمی کوردستان بۆ هەمیشە لە سنوورەکانی کوردستان دابمەزرێ و سیاسەتی بەرگریی لە سنوور و خاک و خەڵکی کوردستان بگرێتە بەر، ئەمە مافی بەرگری کردنە لە خاک و نیشتیمان و نەک بۆ کورد بەڵکوو بۆ هەموو نەتەوەیەکی سەر ئەم جیهانە رەوایە.

زاری کرمانجی: پێتوایە كاتی ئەوە هاتووە كورد، بڕیاری كۆتایی بدات و سەربەخۆی رابگەینێت؟

لە ئێستادا پێكهێنانی كیان و دەوڵەتی سه‌ربه‌خۆ به‌ر له‌ هه‌ر كه‌سێک لەم جیهانەدا مافێكی ره‌وای بێ ئەملا و ئەولای نه‌ته‌وه‌ی كورده‌. سەربەخۆیی و بەدەوڵەتبوونی کوردستان خەون و ئامانجی لە مێژینەی نەتەوەی کوردە و لە ناخی هەر رۆڵەیەکی نەتەوەپارێزی کورد دایە.

نه‌ته‌وه‌ی کورد، وه‌ک نه‌ته‌وه‌یه‌کی کۆڵۆنیکراوی دابه‌شکراو مافی ره‌وای خۆیه‌تی، بۆ هه‌ڵته‌کاندنی ئه‌و ته‌رتیباته‌ سیاسییه‌ ناڕه‌وایه‌ی به‌ سه‌ریدا سه‌پێندراوه‌، تێبکۆشێ. کورد وه‌ک هه‌موو نه‌ته‌وه‌کانی ئه‌م جیهانه‌، مافی ره‌وای خۆیه‌تی، سنووره‌ سیاسییه‌ ده‌سکرده‌کان تێکشکێنێ‌ و ده‌وڵه‌تی نه‌ته‌وه‌یی خۆی دابمه‌زرێنێ.

لە هەمانکاتدا بۆ گه‌یشتن به‌م ئامانجه‌، لۆبی کورد لە دنیای دەرەوە و دۆست و هاوپه‌یمانی نێوده‌وڵه‌تی زۆر پێویسته‌. ئه‌مڕۆ بارودۆخه‌كه‌ به‌ ته‌واوی گۆڕاوه‌ و مافی چاره‌ی خۆنووسین چه‌مکێکی به‌ ناوبانگه‌ و واتایه‌کی روونی هه‌یه‌، واتای راسته‌قینه‌ی ئه‌م چه‌مکه‌ ئه‌وه‌یه‌ که‌ هه‌ر نه‌ته‌وه‌یه‌ک مافی دامه‌زراندنی ده‌و‌ڵه‌تی نه‌ته‌وه‌یی خۆی هه‌بێ.

ئێمە وەک پارتی ئازادیی کوردستان ٢٣ ساڵە لەو پێناوەدا خەبات دەکەین و پێمان وایە: کورد نەتەوەیەکی جیاوازە و بەشێک نییە لە هیچ نەتەوەیەکی دیکە. پرسی کورد لە چوارچێوەی گوتاری دێموکڕاتیزە کردنی داگیرکەرانی کوردستان، هەرگیز ناگاتە چارەسەری راستەقینە و بەستنەوەی پرسی کورد بەم ستراتیژییەوە تەنیا لە کیسچوونی هەل و دەرفەتەکان و خەساربوون و هەدەردانی وزە و تواناکانی نەتەوەکەمانی لێدەکەوێتەوە و كێشه‌ی كورد به‌ دامه‌زراندنی ده‌وڵه‌ت نه‌بێ كۆتایی نایه‌. بۆیە، پارتی ئازادیی کوردستان کە هەڵگری پڕۆژەی رێفراندۆمی سەربەخۆییە بۆ رۆژهەڵاتی کوردستان، پشتیوانیی خۆی لەو پرسە چارەنووسسازە لە هەموو پارچەکانی کوردستان دەکا.

زاری کرمانجی: کورد لەم قۆناغە هەستیارەدا دەبێ چۆن سیاسەت بکا؟

دوژمنانی کورد لە پیلانگێڕی دژ به‌م خاک و نه‌ته‌وه‌ی کورد‌ خافڵ نین و خۆیان مه‌لاس داوه‌ تا هه‌ر هه‌ل و ده‌ر‌فه‌تێک بۆ تاوان بە دژی نەتەوەکەمان بە تایبەتی ئەم کیانەی کورد لە باشووری کوردستان بقۆزنه‌وه‌. بۆیه‌ له‌ به‌رانبه‌ر ئه‌وه‌دا، ده‌بێ رۆڵه‌کانی کوردستان به‌ خه‌ڵک و سه‌رۆکایه‌تی و حکومه‌ته‌وه‌، یه‌کگرتووانه‌ و به‌‌وریاییه‌وه‌، هه‌ڵسوکه‌وت له‌گه‌ڵ بارودۆخه‌که‌ بکه‌ن و پێکه‌وه‌ پیلانه‌کانی دوژمنان پووچه‌ڵ بکه‌نه‌وه‌.

نه‌ته‌وه‌ی مه‌زنی کورد، به‌ یه‌کێتی ریزه‌کانی ده‌توانێ ‌، به‌ره‌نگاری هه‌موو هه‌ڕه‌شه‌کانی دوژمنانی ببێته‌وه‌. کورد دەبێ دروشمی (ئیدەی دیموکراسیزە بوونی ئێران، عێڕاق، ترکیا و سوریا) توڕ هەڵدا. ئەمە مێژوو هاوار دەکا کە ئەم وڵاتانە دیموکراسیزە بوون هەڵناگرێ و بە زۆر لکاندنی چەند نەتەوەیەک بە یەکەوە و ئەو شێوە لە سیستەم و دەسەڵاتە هەڵگری قەبووڵ کردنی دیموکراسی نییە.

هێنانی هێزی دیجلە بۆ ناوچە کورد نشینەکان و پەلامار دانی کوردانی ئەو ناوچانە بە بیانووی جۆراوجۆرەوە و پڕ چەک کردنی دەوڵەتێک کە هیچ جۆرە ئەگەری شەڕی دەرەکی تا دەیان ساڵیتریش تێدا بەدی ناکرێ و بڕینی مووچەی فەرمانبەرانی هەرێمی کوردستان، بۆ کپ کردن و لە ناو بردن و قڕ کردنی کورد نییە بۆ چییە؟

تەنیا چارەسەر بۆ نەمانی شەڕ و هەڕەشە و کوشتاری سەر کوردان جیابوونەوەیە لەو قەوارە بە زۆر داسەپێندراوە و ئەو ته‌رتیباته‌ سیاسییه‌ ناڕه‌وایه‌ی به‌ سه‌ریدا سه‌پێندراوه‌، کە لە تەواوی تەمەنیدا نەک خێری بۆ کورد نەبووە بەڵکوو قڕ کردن، کوشتار، ئەنفاڵ، شیمیاباران و کاول کردنی دەیان هەزار گوند و ....هتدی لێ بۆتەوە.

لە کۆتاییدا دەبێ بڵێم، لابردنی ئەردۆغان، خامنەیی، بەشار و مالیکی هیچ گۆڕانکارییەک لە هەڵوێستی ناوەند دروست ناکا. ئەمە کەسەکان نین کە دژی کورد و کوردستانی بوون دەوەستنەوە، ئەمە سیستەمێکە لە لە سەرەتای دروست بوونیەوە وا هاتووە و کەسەکان تەنیا ئەکتەری ئەم شانۆیەن کە کوردی تێدا دەچەوسێندرێتەوە.

زاری کرمانجی: پارتی ئازادیی کوردستان ئامادەیە هێزی پێشمەرگەی خۆی بنێری بۆ پشتیوانی ئەگەر داعەش یان هەر لایەنێکیتر شڕ لە دژی حکوومەتی هەرێمی کوردستان رابگەیەنێ؟

لە هەرکاتێکدا هێزی پێشمەرگەی حکومەتی کوردستان بە کردەوە بکەوێتە بەرپەرچدانەوەی ئەو دەسدرێژییانەی کە لە هەر لایەکەوە دەکرێتە سەری، لەگەڵ سه‌رۆکایه‌تی سیاسیی باشووری کوردستان هاوهەڵوسێت دەبێ و هێزی پێشمەرگەی پارتی ئازادیی کوردستان ئامادەیی ئەوەی هەیە شان بە شانی هێزی پیشمەرگەی کوردستان لە بەرەی پێشەوەی سەنگەردا به‌رگری لە خاک و خه‌ڵک و حکوومه‌ت و پارلمانی باشووری کوردستان بکا.