درکاندنی زانیاریی بوونی ھێزەکانی ئێران لە عێراق لە لایەن پارتێکی کوردییەوە
20/7/2014
پارتی ئازادیی کوردستان "PAK" رایدەگەیەنێ: ئێران پێنج ھەزار سەربازی خۆی لە سوپای پاسداران بۆ پاڵپشتیکردن و درێژکردنەوەی حوکمڕانیی مالیکی لە عێراق جێگیرکردووە، بەپێی زانیارییەکانی پارتی ئازادیی کوردستان شەوی ١٤ی حوزەیران یەکەم کاروانی ھێزەکانی سوپای پاسدران لەرێگەی قەسری شیرین و نەفت شارەوە ھاتوونەتە عێراق و لە دیالە و سامەڕا و بەغدا و نەجەف و کەربەلا بڵاوبوونەتەوە. حوسێن یەزدانپەنا جێگیری سەرۆکی پارتی ئازادیی کوردستان "PAK" لە لێدوانێکدا بۆ ئاژانسی ئانادۆڵو دەڵێ: ھێزی قودسی سوپای پاسداران ھێزێکی دەرەوەی سنوورەکانی ئێرانە بۆ رێکخستنی گرووپە تیرۆریستییەکان و دەستوەردان لە کاروباری نێوخۆیی وڵاتان بە تایبەت عێراق، ھەمیشە لە دەوروبەری مالیکی بوون و بە دوو تەوەردا کاردەکەن. یەزدانپەنا لەو رووەوە دەڵێ: "ھەرچی زانیاری سیاسی و ئابووریی و سەربازییەکانی عێراقە لە لای سەرۆکوەزیرانی عێراق و ئەو دامەزراوانەی لەژێر دەستی ئەودان بەکاردەھێنن و رۆڵی راوێژکارییان ھەیە، ھەروەھا فەرمان دەدەنە مالیکی کە چۆن لەسەر بابەت و رووداوە سیاسییەکانی عێراق و ناوچەکە ھەڵوێست وەربگرێ و سیاسەت بکات." یەزدانپەنا زانیاریی ورد و وردەکاریی لەبارەی بەشداریکردنی ئێران لەو شەڕانەی لە عێراقدا روودەدا و پێکھاتەی ھێزەکانی ئێران و شوێنی جێگیربوونیان دەخاتەروو و ئاشکرای دەکات: ئێران چوار جۆرە ھێزی رەوانەی عێراق کردووە، پاش رووداوەکانی مانگی رابردوو و گیرانی موسڵ و تکریت و ھەندێ لەشارەکانی دیکە بەشێوەی کردەیی بەشێک لە تیپ و ھێزەکانی سوپای پاسداران لەژێر فەرماندەیی ھێزی قودسدا لەوانە سوپای یەکەمی قەرارگەی رەمەزان کە تایبەتە بە عێراق، لەشکری نەبی ئەکرەم، بەشێک لەھێزەکانی بەیتولموقەدەس، ھێزەکانی بەرفەرماندەیی قەرارگەی نەجەفی ئەشرەف کە لە کرماشانن، بەرە بەرە ھاتووەنەتە نێو عێراقەوە. یەزدانپەنا کە سوورە لەسەر وردی و دروستیی زانیارییەکانی، بێ ئامادەبوون بە ئاشکراکردنی سەرچاوەی زانیارییەکانی روونی دەکاتەوە سەرچاوەی زانیارییەکانیان ئاشکرا ناکەن، بەڵام ھێما بۆ ئەوە دەکات ئەو زانیارییانەی دروستن و لە ھەناوی دامەزراوەکانی ئێران و سەرچاوە باوەڕپێکراوەکانییانەوە پێگەیشتووە. لەبارەی یەکەم ھاتنەناوەوەی ھێزەکانی قودس لەپاش رووداوەکانی ٩ی حوزەیران و کۆنترۆڵکردنی موسڵ لەلایەن چەکدارەکانەوە، جێگری سەرۆکی پارتی ئازادیی کوردستان"PAK" دەڵێ" پرۆسەی ھاتنەناوەوەی ھێزەکانی ئێران بۆ نێو عێراق لە شەوی ١٤ی حوزەیرانەوە بە کاروانێکی سەدان ئۆتۆمبیلی لە ناوچەکانی قەسری شیرین و نەفت شارەوە لە سنووری ئێران ھاتونەتە پارێزگای دیالە و دواتر لە سامەڕا و بەغدا و نەجەف بڵاوەیان پێکراوە، بەتایبەت لەو ناوچانەی کە شوێنە پیرۆزەکانی شیعەیان لێیە." وردتریش روونی دەکاتەوە" ئەو ھێزانە لە قاعیدەی ئەلرەشید و شوێنی ھێزەکانی پێشووی موجاھیدنن لە بەغدا و خاڵس و عوزێم، ھەروەھا لە ژووری ناوەندیی کردەکانن لەبەغدا ، لە دیالە و سامەڕا ھەن لەنێوان مەرقەدی ئیمامی حوسێن و ئیمامی عەباسیش ھەن، لە مەعەسکەری تاجییش بوونیان ھەیە، لە فرۆِکەخانەی موسەنا و نێودەوڵەتی بەغدا ھەن." لەبارەی ژمارەی ئەو ھێزانەشی کە ھاتوونەتە عێراقەوە حوسێن یەزدانپەنا روونی کردەوە" بە گشتی زیاتر لە پێنج ھەزار کەس لە ھێزەکانی ئێران ھاتوونەتە عێراقەوە و لەشەڕەکانی ئەمدواییەدا بەشدارییان کردووە، ئەو کەمە پێشڕەوییەشی سوپای عێراق لە تکریت کردوویەتی بە بەشداریی فەرماندە و ھێزەکانی ئێران بوون، ئەگەرچی چەندین کەسیشیان لێکوژراوە، پێرێش لە سامەڕا ٢٤ کەس لەو ھێزانە کورژراون". یەزدانپەنا کوژرانی چەند ئەفسەر و پاسدارێکی ئێرانیش لە عێراق و راگەیاندنی تەنانەت لە دەزگا راگەیاندنەکانی ئێران بە بەڵگەی قسەکانی دەھێنێتەوە. جێگری سەرۆکی ئەو پارتە بەرھەڵستکارەی رژێمی ئێران کە لەساڵی ١٩٩١ دامەزراوە و داوای ئازادیی بۆ گەلی کورد و وەرگرتنی مافەکانی لەو وڵاتە دەکات و چەند ساڵێکە لە ھەرێمی کوردستانەوە چالاکییەکانی ئەنجام دەدات، لەبارەی ئەرکی ئەو ھێزانەی ئێران بۆ عێراقی ناردوون دەڵێ:" رێکخستنەوەی ھێزەکانی مالیکی و یارمەتیدانی بۆ لەسەر پێ خۆی راوەستان و پەیڕەوکردن و جێگیرکردنی سیاسەتەکانی ئێرانە بەسەر عێراقەوە. لەمەڕ ئەو بەڵگانەشی کە لەبارەی بوونی ھێزی ئێرانی لە عێراق داویانە یەزدانپەنا دەڵێ: "زانیارییەکانی ئێمە زانیاریی تایبەت و نھێنیین کە ئاڵوگۆڕیان پێدەکرێ، ئێمە لە شارەکانی کوردستان رێکخستنەکانی خۆمان و سەرچاوەکانی خۆمان لەنێو دامەزراوەکانی دەوڵەتیشدا ھەیە، جگە لەوەی چاودێری جوڵەی ھێزەکانی ئێرانمان کرد لەکاتی دروستبوونی قەیرانەکەی ئەمدواییە، چونکە شاھیدی دەستوەردانەکانی ئێران بووین لە عێراق لە ٢٠٠٣ و دواتریش." جێگری سەرۆکی پارتی ئازادیی کوردستان "PAK" لە درێژەی قسەکانیدا دەڵێ: "ھێزی سەرەکیی ھاتووە ناوەوەی ئێران بۆ عێراق ھێزی سوپای یەکی قەرارگەی رەمەزانن کە بە مەشق و راھێنانێکی تەواوەوە لە تارانەوە رەوانەی سەربازگەی ئیمامی عەلی کراون و دواتریش ھێنراونەتە عێراق." ھەروەھا زانیاریی ئەوەش دەدا کە ئەو فرۆکە شەڕکەرانەی ئێران بەمدواییانە بۆ عێراقی گەڕاندوونەتەوە یەزدانپەنا گوتی: "زانیاریی تەواومان ھەیە ئەو فڕۆکانە لە بنکەی ئەلرەشیدن لە بەغدا و ژمارەیەک فڕۆکەی بێ فرۆکەوانی ئێرانیش خراوەتە بەردەستی مالیکی بۆ بەدیھێنانی ئامانجەکانی." لەبارەی ئەو کێشانەشی لەنێوان حکومەتی ھەرێم و حکومەتی ناوەندی عێراقدا ھەیە و تادێت ئاڵۆزتردەبێ بەتایبەت پاش کۆنترۆڵکردنی ناوچە دابڕاوەکان لەنێویاندا کەرکوک لەلایەن ھێزەکانی پێشمەرگەوە و ھەڕەشەکانی بەغدا لەھەرێم، حوسێن یەزادنپەنا دەڵێ: "ئەوان ٨٠٠ پێشمەرگەیان ئامادەیە بە ھەموو چەک و پێداویستییەکەوە بۆ ئەوەی پارێزگاری لە سنووری ھەرێمی کوردستان و خەڵکی باشوور بکەن." دەشڵێ: "لەکاتی پێویست ئەگەر سەرۆکی ھەرێمی کوردستان بانگەواز بۆ کوردانی رۆژھەڵات بکات، ئەوا بە ھەزاران لاوی رۆژھەڵات خۆیان دەگەیەننە ریزەکانی ئێمە و سوپای ھەرێمی کوردستان بۆ پارێزگاریکردن لە باشوور و سنوورەکەی." لەبارەی ھاریکاریکردنی ئێرانیشەوە بۆ مالیکی و مانەوەی لە پۆستەکەیدا یەزدانپەنا دەڵێ:" ئێران خاوەنی دەسەڵاتی مەزھەبی و سیاسییە لە عێراق و مالیکی لەژێر فەرمانی ئێراندایە، گوێڕاڵی قاسم سلێمانی و ستافەکەیەتی، ئێرانیش دەیەوێ لەرێگەی مالیکییەوە ئەجێندای خۆی لەعێراق جێبەجێکات و ئەو وڵاتە بکاتە مەترسی بۆ سەر وڵاتانی کەنداو، جگە لەوەی دەیەوێ لەو رێگەیەوە بۆ سوریا و لوبنان بچێ و ھیلالە شیعییەکەی تەواوبکات". جێگری سەرۆکی "PAK" ھەڵوێستی حزبەکەشی لەبارەی پاڵپشتیی ئیسرائیل و دژایەتیی ئێران بۆ دامەزراندنی دەوڵەتی کوردستان نیشان دەدات و دەڵێ: "ئیسرائیل تا ئێستا زیانی لە نەتەوەی کورد لە رۆژھەڵات نەبینیوە و نەھجی دژایەتی ئیسرائیلیش لای کورد نییە، ئیسرائیل کە سیستەمی دیموکراسیی بەڕێوەدەبات پێیخۆشە گەلێکی وەکو کورد ببێتە دەوڵەت و بەھا دیموکراتییەکان پەیڕەو بکات و ئێران تووشی قەیران و لێکترازان ببێ." یەزدانپەنا ھەڵویستی ئیسرائیل کە بە ئاشکرا پاڵپشتیی خۆی بۆ دامەزراندنی دەوڵەتی کوردستان دەربڕی بە جێی سوپاس دەزانێ و دەڵێ: "نابێ کورد بەبیانووی مەزھەبی یان ئاینی خۆی بەدوور بگرێ لەو پەیوەندییە و پێم باشە پەیوەندیی ھەبێ." لەمەڕ دژایەتیکردنەکەی ئێرانیش دەڵێ: "ئێران بەدوو ھۆکار دژایەتی دەوڵەتی کوردستان دەکات، ئێران پێیوایە ئەگەر دەوڵەتێکی کوردی دروست ببێ لە رۆژھەڵاتی ناوەڕاست دەبێـتە ھاندەر بۆ گەشەی خەباتی کورد لە رۆژھەڵات بەتایبەت، جگە لەوەی سیفەتەکەی حکومەتی مالیکی گوێڕایەڵی ئێرانە، بۆیە ئێران نایانەوێ عێراق تووشی ھەڵوەشانەوە ببێ، بۆیە ھەتا پێیان دەکرێ دژایەتی دەوڵەتی کوردی دەکەن." لەکۆتایی قسەکانیشدا یەزدانپەنا راگەیاندنی دەوڵەتی کوردستان بە ھەنگاوی دروست دەزانێ و بە چارەسەری گونجاوی تەماشا دەکا بۆ دەربازبوون لە قەیرانەکانی عێراق، دەشڵێ: "پاش راگەیاندنی کە دەبێتە واقیع، وڵاتانی دنیا و ئێرانیش خۆیان لەگەڵی دەگونجێنن و مامەڵەی لەگەڵدا دەکەن."
|