PAZADIK: پارتی ئازادیی كوردستان رایدەگەیەنێ ھێشتا زیاتر لە ٤٠٠ پێشمەرگەیان لە میحوەرەكانی شەڕی دژ بە داعش لە ھەرێمی كوردستان شەڕ دەكەن و ١٠٠ پێشمەرگەشیان ئامادە كردووە بۆ شەڕكردن لە كۆبانێ.

پارتی ئازادییی كوردستان ئاشكرای دەكات زیاتر لە چوار سەد پێشمەرگەیان لە بەرەكانی شەڕدایە لەگەڵ ھێزی پێشمەرگەی ھەرێم لە دژی چەكدارانی داعش.

جێگری سەرۆكی پارتی ئازادیی كوردستان(PAK) حوسێن یەزادنپەنا لە لێدوانێكدا بۆ ئاژانسی ئانادۆڵو گوتی ھێزەكانی پارتی ئازادیی كوردستان ھەر لە رۆژی یەكەمی كە كورد بڕیاری دا شەڕی بەرگریی بكاتە شەڕی ھەڵمەت بردن لە دژی چەكدارانی دەوڵەتی ئیسلامی ناسراو بە داعش ھێزەكانی ئەوان بەشدارییان كردووە و ئێستا لە زۆرینەی میحوەرەكانی شەڕ دابەش بوون.

یەزدانپەنا لەو بارەیەوە زانیاریی زیاتری دا و گوتی: "لە سەرەتاوە دوو گوردان پێشمەرگەی پارتی ئازادیی كوردستان لەو شەڕەدا بەشدارییان كرد، ئێستا چوار گوردانی پێشمەرگەمان لە شەڕدان، ھێزەكانی ئێمە بەسەر زۆرینەی میحوەرەكانی شەڕی پێشمەرگە دژ بە چەكدارانی داعش دابەش بوون و لە ریزەكانی ھەرە پێشەوەی شەڕكردنن."

لەبارەی ژمارەی ئەو پێشمەرگانەشیانەوە كە شەڕی دژ بە داعش دەكەن یەزدانپەنا گوتی: "چوارسەد و سی تا چل پێشمەرگەی پارتی ئازادیی كوردستان ئێستا لە بەرەكانی شەڕدان لەدژی داعش."

قسەكانی یەزدانپەنا كە پارتەكەی یەكێكە لە پارتە بەرھەڵستكارەكانی رژێمی ئێران و بارەگای سەرەكیی لە ھەرێمی كوردستانە و خاونی ھێزی چەكداریی بەخۆیەتی لە سەروبەندی رێوڕەسمی چلەی ماتەمەینی كوژرانی كچە پێشمەرگەیەكی ئەو پارتە دێت كە لە شەشی مانگی رابردوو لە بەرەیەكی شەڕ لە نزیك كەركوك لەلایەن چەكدارانی داعشەوە كوژرا.

نیگار حوسێنی ئەو كچە نۆزدە ساڵییەی پێشمەرگەی پارتی ئازادیی كوردستان بوو لە ساڵی ١٩٩٥ لە شاری بۆكان لەدایك ببوو.

لەبارەی ئامادەیی حزبەكەی بۆ ناردنی ھێزی سەربازی بۆ كۆبانی یەزدانپەنا بۆ ئاژانسی ئانادۆڵو گوتی: "گوردانێكی ١٠٠ پێشمەرگەییمان ئامادەكراون بۆ ئەوەی بچنە ناو كۆبانی بۆ بە ھاناوە چوونی شەڕڤانانی ئەوێ، بەڵام ئەو گرفتەی كە ھەبوو بۆ ھەمووان لە ناردنی ھێز ئێمەش دەگرێتەوە."

ئاشكراشی كرد لەبارەی ناردنی ئەو ھێزە لەگەڵ لایەنەكانی دیكەش قسەیان كردووە.

یەزادنپەنا باسی لەوەشكرد كە پێش ناردنی ھێز دەیانەوێ ھەماھەنگی و ھاریكاریی لەگەڵ ئەو لایەنانە بكەن كە لە كۆبانێ لە مەیداندا ھەن و لەگەڵ لایەنەكانی دیكەش گفتوگۆ بكەن، گوتیشی: "دەمانەوێ ناردنی ھێزمان ھەروا سەرەڕۆییانە لەگەڵ بابەتەدا نەبێ، بەڵكو ھەماھەنگی لەگەڵ لایەنە پەیوەندیدارەكان لە ئارادابێ، ھەركاتێك ئەو ھەلومەرجەی پێویست بوو رەخسا ئەوا ھێزەكەمان دەنێرین."

ئەوەشی دووپات كردەوە كە ھیچ لایەنێك داوای ناردنی ھێزی سەربازییان لێ نەكردوون بۆ كۆبانی، بەڵكو وەكو ھەستكردنێكی نیشتمانی ئەو بڕیارەیان داوە.

جێگری سەرۆكی پارتی ئازادیی كوردستان (PAK) لە درێژەی قسەكانیدا بە دووری زانی لە ناردنی ھێز بۆ كۆبانێ كێشەیان بێتە رێ و ناردنی چەك و پێویستیی سەربازی بۆ كۆبانێ لەلایەن ھەرێمی كوردستانەوە بە پشتیوانی بۆ ئەو كارەی خۆیان دەزانێ. بە پێچەوانەشەوە پێشبینی ئاسانكاریكردنیشی بۆ ئەو ھەنگاوەیان كرد.

لەبارەی كشانەوەی ھێزەكانییان لە بەرەكانی شەڕی دژ بە داعش لە ھەرێمی كوردستان حوسێن یەزدانپەنا دەڵێ: "ھێزەكەی ئێمە نە لەسەر داوای كەس چووە بۆ بەرەكانی شەڕ و نە مۆڵەتیشی لە كەس وەرگرتووە، نە ھیچ داواكارییەكی چەك و چۆڵمان لە ھیچ لایەنێك كردووە، بەڵكو پێشمەرگەكانمان بە پێداویستییەكانی خۆیانەوە ئامادەی ئەو بەرەیە بوون".

لەمەڕ ھەڵوێستی ئێرانیشەوە كە نیگەرانیی خۆی گەیاندووەتە بەرپرسانی ھەرێم لە بەشداریكردنی ھێزە چەكدارەكانی پارتە كوردییەكانی ئێران لە ھەرێم لە شەڕی دژ بە داعش یەزادنپەنا گوتی: "ئەو داوایەی ئێران بەسەر ئێمەدا ناچەسپێ، چونكە لایەنەكانی تر داوایان لێمان نەكردووە تا بكشێینەوە، ئیتر ئەوە كوردستانە و دنیا دژی تیرۆرە و ھاوپەیمانێتییەكی نێودەوڵەتی بۆ ئەو مەبەستە دروست بووە، ھێزێكی شەڕكەری وەكو ھێزەكانی ئێمە پێشمەرگەش پێیخۆشە ھەبێ."