حسێن یه‌زدان په‌نا له‌چاوپێکه‌وتنێکى بۆ رۆژ نامه ی هاوڵاتی-دا، “ئێران داعشى کرد به‌گژ کوردا”
20/11/2014
سازدانى: ئاڵا وشیار حسێن یه‌زدان په‌نا، جێگرى سکرتێرى پارتى ئازادى کوردستان، یه‌کێتى نیشتیمانى کوردستان تۆمه‌تبارده‌کات به‌رێگریکردن له‌پێشمه‌رگه‌کانى ئه‌و پارته‌ى رۆژهه‌ڵات بۆ شه‌ڕکردن له‌سنوره‌کانى ژێر ده‌سه‌ڵاتیدا دژ به‌داعش، ده‌ڵێت ئه‌و حزبه، بۆ رازیکردنی دڵی ئێران پاشه‌کشێى به‌هێزى سه‌ربازى حزبه‌کانى رۆژهه‌ڵات کردوه له‌به‌ره‌کانى شه‌ڕ. پارتى ئازادى کوردستان (پاک)، پارتێکى ئۆپۆزسیۆنى رۆژهه‌ڵاتى کوردستانه‌و له‌ساڵى 1991دا دامه‌زراوه، له‌ئێستادا ژماره‌یه‌ک له‌پێشمه‌رگه‌کانیان له‌سنورى شه‌ڕى دژه داعشى پارتیدان.
حسێن یه‌زدان په‌نا له‌چاوپێکه‌وتنێکى هاوڵاتی-دا، پێیوایه لێدوانى به‌رپرسانى ئێران سه‌باره‌ت به‌وه‌ى سوپاى ئه‌و وڵاته قه‌زاى مه‌خموریان له‌ده‌ست داعش ئازادکردوه «سوکایه‌تیکردن بوو به‌خه‌ڵک‌و حکومه‌تی هه‌رێم»، جه‌ختیشیکرده‌وه که یه‌کێک له‌کارته‌کانی ئێران داعشه، شه‌ڕی کورد‌و داعشیش به‌یه‌کێکه له‌پرۆژه‌کانی قاسم سلێمانی سه‌رۆکى سوپاى قودس داده‌نێت. هاوڵاتی: سه‌ره‌تا له‌وه‌وه ده‌ستپێده‌که‌ین، پێشمه‌رگه‌کانى ئێوه له‌و سنورانه‌دا شه‌ڕ له‌دژى داعش ناکه‌ن که یه‌کێتی تیایدا باڵاده‌سته، ئه‌مه بۆ؟ حسێن یه‌زدان پەنا: ئه‌م دابه‌شکاریه که سنوری یه‌کێتی‌و پارتیه شتێکی ناخۆشه، کوردستان بۆ من هه‌ر کوردستانه، هیچ سنور‌و سه‌نگه‌رێک له‌باشور بۆ پارتی ئازادیی کوردستان جیاوازی نیه، له‌هه‌ر کوێ هه‌ڕه‌شه له‌سه‌ر کوردستان بێت ئه‌وه به‌دڵنیایه‌وه هێزه‌که‌ی ئێمه ئاماده‌یه. به‌ڵام لێره‌دا یه‌ک شت هه‌یه، ئه‌ویش بونی هێزی سوپای پاسداران‌و سوپای ئێرانه له‌و سنورانه که یه‌کێتی تێیدا باڵاده‌سته، ئێمه ئاماده‌نین له‌سه‌نگه‌رێکدا شه‌ڕ بکه‌ین که هێزی ئێرانی تێدایه. هاوڵاتی: به‌ڵگه‌ى ئێوه له‌سه‌ر ئه‌و تۆمه‌ته چیه؟ حسێن یه‌زدان پەنا: له‌ڕاستیدا ئێمه زانیاری وردمان نیه، به‌ڵام سه‌رکرده‌کانی یه‌کێتی ئاماژه‌یان به‌بونی هێزی ئێرانی داوه له‌سنوره‌که‌یان، ته‌نانه‌ت کۆمه‌ڵێک وێنه‌ى قاسم سلێمانیمان بینیوه که پێشمه‌رگه‌ی له‌گه‌ڵدایه، ئه‌مانه به‌ڵگه‌ی ته‌واون بۆ ئه‌وه‌ی بڵێین له‌سنوری یه‌کێتی، هێزه‌کانی ئێران بونیان هه‌یه. دۆزینه‌وه‌ی بکوژانی سه‌عیدى برام ده‌که‌وێته ئه‌ستۆی یه‌کێتی
هاوڵاتی: ئه‌گه‌ر دوژمنى هاوبه‌شتان له‌گه‌ڵ ئێران هه‌یه که داعشه، کێشه چیه بۆ پێکه‌وه شه‌ڕ له‌دژى ئه‌و گروپه ناکه‌ن؟ حسێن یه‌زدان پەنا: هه‌رگیز شتی له‌و شێوه رونادات، له‌ڕاستیدا قاسم سلێمانی سه‌رۆکى سوپاى قودسى ئێران دژ به‌داعش شه‌ڕ ناکات، هاتنی قاسم سلێمانی‌و هێزی ئێران ته‌نیا بۆ ئیداره‌ی قه‌یرانێکه که خۆیان له‌ناوچه‌که‌دا دروستیان کردوه، سلێمانی ده‌یه‌وێت له‌م ناوچه‌دا کارتی سیاسی خۆی به‌کاربێنێت. هاوڵاتی: کام کارت؟ حسێن یه‌زدان پەنا: یه‌کێک له‌کارته‌کانی ئێران داعشه. هاوڵاتی: له‌گه‌ڵ یه‌کێتی قسه‌تان کردوه که له‌سنوره‌کانی ئه‌وانیش هێزی خۆتان جێگیر بکه‌ن؟ حسێن یه‌زدان پەنا: له‌به‌ر بونی مه‌سه‌له‌ی ئێران که بۆ ئێمه هه‌ستیاره، هه‌وڵمان نه‌دا که سه‌ربه‌خۆ بڕۆینه شه‌ڕه‌وه، نوێنه‌رایەتی پارتی ئازادیی کوردستان له‌سلێمانی به‌ڕه‌سمی داوای پشتگیری سه‌ربازی له‌مه‌کته‌بی په‌یوه‌ندیه‌کانی یه‌کێتی کردوه، به‌ڵام له‌کاتێکدا بوو که هێزی ئێرانی به‌فیزیکی هێشتا نه‌هاتبوه ناو کێشه‌ی سیاسی‌و سه‌ربازیه‌کانی هه‌رێمى کوردستان، به‌تایبه‌ت له‌سنوری یه‌کێتی. هاوڵاتی: وه‌ڵامى یه‌کێتى چى بوو؟ حسێن یه‌زدان پەنا: له‌سه‌ر داواکاری ئێمه بۆ ئاماده‌بون له‌شه‌ڕدا له‌سنوری یه‌کێتی، مه‌کته‌بی سیاسی یه‌کێتی سوپاسی کردوین‌و وتویه‌تی ئه‌گه‌ر پێویستمان پێتانبێت ئه‌وه به‌دڵنیایه‌وه ئاگادارتان ده‌که‌ینه‌وه. هاوڵاتی: ئه‌ى بۆ له‌سنورى پارتى بونتان هه‌یه؟ حسێن یه‌زدان پەنا: بونی ئێمه له‌سنوری پارتی‌و ئاماده‌نه‌بونمان له‌سنوری یه‌کێتی په‌یوه‌ندی به‌ئێمه‌وه نیه، به‌ڵکو په‌یوه‌ندی به‌و دۆخه‌وه هه‌یه که بوه به‌ئه‌مری واقیع. ئێران یارمه‌تى حزبه ئیسلامیه‌کانى باشور ده‌دات
هاوڵاتی: بۆچی له‌ئێستادا جگه له‌ئێوه، هێزه‌کانی کۆمهڵهو دیموکراتى ئێرانیش له‌شه‌ڕه‌کانی دژ به‌داعشدا نابینرێن؟ حسێن یه‌زدان پەنا: له‌کاتی خۆئاماده‌کردنی دیموکرات‌و کۆمه‌ڵه بۆ به‌شداریکردنیان له‌شه‌ڕی دژ به‌داعش، ئێمه له‌سنوری موسڵ له‌شه‌ڕدا به‌شداربوین، به‌وته‌ی کۆمهڵهو دیموکرات حکومه‌تی هه‌رێم داوای لێیانکردوه له‌شه‌ڕدا به‌شداربن، ئه‌وه‌بوو هاتن‌و دواتریش گه‌ڕانه‌وه بۆ نێو که‌مپه‌کانیان. هاوڵاتی: ئه‌و پاشه‌کشێیه‌ى ئه‌وانیش به‌فشاری ئێران بوه؟ حسێن یه‌زدان پەنا: پێموانیه ئێران راسته‌وخۆ داوای له‌حکومه‌تی هه‌رێم کردبێت، به‌ڵام پێده‌چێت یه‌کێتی بۆ رازیکردنی دڵی ئێران ئه‌و هێزانه‌یان پاشه‌کشێ پێکرد. هاوڵاتی: ئێوه وه‌ک لایه‌نه کوردیه‌کانى رۆژهه‌ڵات هێزی ئه‌وه‌تان هه‌یه شانبه‌شانى پێشمه‌رگه شه‌ڕى داعش بکه‌ن؟ حسێن یه‌زدان پەنا: ئێمه دوو ساڵ له‌وه پێش خۆمان ئاماده‌کردبوو بۆ شه‌ڕێکی له‌م شێوه، ئێمه ده‌مانزانی له‌م ناوچه‌یدا شه‌ڕ سه‌رهه‌ڵده‌دات، نه‌ک به‌دیاریکراوی بزانین‌و ئاگادار بین که هێزێک وه‌ک داعش روو له‌م ناوچه‌یه ده‌کات، هه‌ر بۆیه ئێمه خۆمان ئاماده‌کردبوو، به‌ڵام به‌ڕاگه‌یاندنی کۆمهڵهو دیموکراتدا‌و خوێندنه‌وه‌ی بۆ دۆخی سیاسی له‌دوای هاتنی داعش دیاره که ئاماده‌یی شه‌ڕیان چ له‌ڕوی سه‌ربازی‌و چ له‌ڕوی سیاسیه‌وه زۆر لاوازه. هاوڵاتی: که ئێوه ده‌ڵێن ئێرانى رۆڵى خراپه له‌شەڕى داعشدا به‌ڵام هێزه سه‌ربازیه‌کانى ئه‌و وڵاته رۆڵى سه‌ره‌کیان هه‌بوو له‌گرتنه‌وه‌ى قه‌زاى مه‌خموردا؟ حسێن یه‌زدان پەنا: بونی که‌سانێک یان چه‌ند که‌سێک له‌سنورێک ناتوانین پێیبڵین رۆڵی ئیجابی، به‌ڵێ بونیان بوه، به‌ڵام هێنده نه‌بوه که گرنگی بێت، پێموایه په‌لاماردانی کوردستان له‌لایه‌ن داعشه‌وه بۆ سیاسه‌تی ئێران ده‌گه‌ڕێته‌وه، چونکه هێزێکی نوستو‌و له‌ناو داعش له‌ژێر ئه‌مر‌و فه‌رمانی سوپای قودسی ئێراندایه. ئاماده‌یی شه‌ڕی کۆمهڵهو دیموکرات زۆر لاوازه
هاوڵاتی: به‌ڵام ئه‌وه گومانێکى مه‌ترسیداره، به‌ڵگه‌ت هه‌یه؟ حسێن یه‌زدان پەنا: وه‌ک به‌ڵگه نه‌خێر، به‌ڵام نابێ ئه‌وه‌مان له‌بیربچێت، سیاسه‌ت ته‌نیا به‌ڵگه نیه، به‌شێکی لێکدانه‌وه‌‌و خوێندنه‌وه‌کانی واقعه، له‌چه‌ند سایتێکی نزیک له‌کۆمارى ئیسلامى ئێرانه‌وه ئاماژه به‌وه ده‌کرێت که په‌لاماردانی کوردستان بۆ سیاسه‌ت‌و پلانێک ده‌گه‌ڕێته‌وه که قاسم سلێمانی سه‌رپه‌رشتی کردوه، شه‌ڕی کورد‌و داعش به‌گژ کورداکردن یه‌کێکه له‌پرۆژه‌کانی قاسم سلێمانی. پێمانوانه‌بێت ئێران شیعه‌یه ئیتر یارمه‌تی هێزه سوننه‌کان نادات له‌ناوچه‌که‌دا، بۆ نمونه بزوتنه‌وه‌ى حه‌ماس‌و هێزه ئیسلامیه‌کانی باشوری کوردستان سوننه‌ن‌و ئێران بۆ پاراستنی به‌رژه‌وه‌ندی سیاسی خۆی یارمه‌تیده‌ریانه. هاوڵاتی: ده‌سه‌ڵاتدارانی ئێران، له‌وانه ره‌فسه‌نجانی‌و خامنه‌یی ئاماژه‌یان به‌وه‌دا که ٧٠ که‌س له‌هێزه‌کانی ئێران توانیان مه‌خمور‌و هه‌ولێر بپارێزن، ئه‌وه‌ش پێچه‌وانه‌ى بۆچونه‌که‌ى تۆیه؟ حسێن یه‌زدان پەنا: ئه‌و قسانه سوکایه‌تیکردن بوو به‌خه‌ڵک‌و حکومه‌تی هه‌رێمی کوردستان. هاوڵاتی: ئێستا هه‌رێم به‌سه‌ر دوو جه‌مسه‌رى یه‌کێتى نزیک له‌ئێران‌و پارتى نزیک له‌تورکیادا دابه‌شبون بونى ئێوه له‌سنورى پارتى‌و نه‌بونتان له‌سنورى یه‌کێتى په‌یوه‌ندى به‌و جه‌مسه‌رگیریه‌وه نیه؟ حسێن یه‌زدان پەنا: من بۆ خودی یه‌کێتی نیگه‌رانم، یه‌کێتی له‌سه‌ره‌تای شۆڕشه‌وه خوێنی زۆری داوه‌‌و له‌مه‌یدانی خه‌باتدا به‌شدار بوه، به‌ڵام ئه‌مڕۆ به‌سیاسه‌تێکی ناوهاوسه‌نگ زیانی به‌خه‌بات‌و رابردوی خۆی گه‌یاندوه، یه‌کێتی نه‌ده‌بوو مه‌جال به‌ئێران بدات که بێته باشوری کوردستان. هاوڵاتی: به‌ڵام ده‌وترێت کوژرانى برایه‌کت له‌سنورى سلێمانى به‌ناوى سه‌عید یه‌زدان په‌یوه‌ندى هه‌یه به‌نیگه‌رانیت له‌یه‌کێتى که باڵاده‌ستى ئه‌و سنوره بوه؟ حسێن یه‌زدان پەنا: مام جه‌لال (سکرتێرى گشتى یه‌کێتى) بۆ شه‌هیدبونی سه‌عیدی برام زۆر به‌داخ بوو، کاتێک مام جه‌لام بینی وتی «حه‌یف بۆ کاک سه‌عید»، له‌ڕاستیدا ناسین‌و دۆزینه‌وه‌ی بکوژانی کاک سه‌عید ده‌که‌وێته ئه‌ستۆی یه‌کێتی، هه‌رچه‌نده ئه‌و سه‌رده‌مه، سه‌رده‌می به‌ره‌ی کوردستانی بوو، به‌ڵام ناوچه‌که ناوچه‌ی ژێر ده‌سه‌ڵاتی یه‌کێتی بوو، دوای 23 ساڵ له‌شه‌هید بونی کاک سه‌عیدی برام ئه‌و که‌یسه له‌لای ئێمه هه‌ر زیندوه. هاوڵاتی: ئێوه له‌سه‌ره‌تای شه‌ڕدا به‌جلی کوردیه‌وه له‌سه‌نگه‌ر ئاماده‌بون، به‌ڵام ئێستا به‌جلی سه‌ربازیه‌وه له‌سه‌نگه‌ره‌کان ده‌بینرێن، ئه‌م گۆڕانکاریه بۆچی بوو؟ حسێن یه‌زدان پەنا: له‌به‌رکردنی جلی کوردی وه‌ک ناسنامه‌ی ئێمه‌ی لێده‌هات که ئه‌مه ده‌یتوانی مه‌ترسی بۆ ئێمه دروست بکات، به‌تایبه‌ت له‌لایه‌ن ئێرانه‌وه. http://hawlati.co/%D8%A6%DB%95%D8%B1%D8%B4%DB%8C%DA%A4%DB%95%DA%A9%D8%A7%D9%86/60872
|