ڕێگەیەكی نوێ بۆ په‌لاماردانی هێزەكانی توركیا بەكاردێنێ
شاره‌زایه‌كی بواری سه‌ربازی له‌باره‌ی ئۆپه‌راسیۆنی (قه‌ڵغانی فورات)ه‌وه چه‌ند زانیارییه‌كی نوێ ئاشكرا ده‌كات، لەوانەش داعش ته‌كنیكی شه‌ڕی گۆڕیوه و ئه‌مجاره ئاژه‌ڵیش به‌كارده‌هێنێت بۆ ئەنجامدانی ته‌قینه‌وه.
به‌گوێره‌ی ئه‌و زانیارییانه‌ی عه‌بدوڵڵا ئاغر بۆ ته‌له‌ڤزیۆنی (سی ئێن ئێن)ـی توركی ئاماژه‌ی بۆ كردووه، ئه‌مڕۆ داعش بۆمبی به ملی سه‌گێكه‌وه ناوه و به‌ڕێی كردووه بۆ ناو سوپای توركیا تا خۆی پێیاندا بته‌قێنێته‌وه، بەم هۆیەوە هاووڵاتییه‌كی سڤیل كوژراوه و چه‌ند سه‌ربازێكی سوپای سوریای ئازادیش بریندار بوون.
ئاغر له به‌شێكی دیكه‌ی قسه‌كانیدا باسی له ته‌قاندنه‌وه‌ی پاسێكی داعش كرد له هه‌فته‌ی رابردوو له ئه‌لباب كه سوپای توركیا كردویه‌تییه ئامانج و 8 چه‌كداری داعشی تێدا كوژراون، له‌ناویاندا سه‌ركرده‌یه‌كی دیار به ناوی ئه‌بو محه‌مه‌د عه‌دنانیش كوژراوه، كه داعش به كوشتنی ئه‌و سه‌ركرده‌یه‌یان زۆر په‌شۆكاوه و هه‌موو هه‌وڵێك ده‌دات بۆ په‌لاماردانی سوپای توركیا.
هه‌روه‌ها داعش ده‌یه‌وێت له رێگه‌ی به‌كارهێنانی ئاژه‌ڵه‌وه كه دیارترینیان سه‌گه، په‌لاماری سوپای توركیا بدات و بۆمب و تی ئێن تی بخاته مل یان شوێنێكی شاراوه تا به سوپای توركیادا بته‌قێته‌وه، ئه‌مه‌یش هه‌ر به گوته‌ی ئاغر.